Кніга прысвечана вялікаму сыну беларускага народа, выдатнаму вучонаму і выдатнаму чалавеку - акадэміку Леаніду Міхайлавічу Сушчэні. Сваімі ўспамінамі падзяліліся яго родныя, сябры, калегі. Упершыню прадстаўлены ўнікальныя дакументы і фатаграфіі з яго асабістага архіва, лісты, артыкулы, выступленні.
У аснове кнігі - рэальныя дакументы і матэрыялы з жыцця Леаніда Міхайлавіча, і, вядома ж, наша памяць, вышыня спраў і учынкаў гэтага чалавека, сіла духу і чалавекалюбства. З ім сапраўды было цікава ... Ён усюды быў жаданым і паважаным.
10-ы прэзідэнт Акадэміі навук Беларусі Леанід Міхайлавіч Сушчэня ўсё сваё жыццё звязаў з акадэмічным асяроддзем, у якім ён фарміраваўся і фарміраваў іншых, даваў урокі, якія застануцца ў нашых сэрцах назаўжды, дзе прайшоў шлях годны для пераймання - вучонага-даследчыка і арганізатара навукі, здольнага захаваць і ўмацаваць статус акадэмічнай навукі ў сітуацыі крызісу перабудовы, унесці свой уклад у скарбонку сусветных дасягненняў, стварыць вядомую далёка за межамі нашай краіны навуковую школу гідрабіёлагаў, стаць чалавекам года “за выбітныя дасягненні ў галіне экалогіі і аховы навакольнага асяроддзя” і атрымаць медаль ад біяграфічнага цэнтра Кембрыджа (Велікабрытанія), удастоіцца ордэна Айчыны ІІ ступені ... і заваяваць сэрцы шэрагу пакаленняў навукоўцаў.
“Калі, - як казаў Леанід Міхайлавіч, - ажыццяўляеш новую ідэю, у цябе нібы распраўляюцца крылы”. Дзеля гэтага, уласна, жыў і тварыў акадэмік Л.М. Сушчэня.
Да мерапрыемства падрыхтавана выстава “Жыццё ў навуцы. Памяці вучонага Л.М. Сушчэні”. Экспазіцыю складуць асноўныя друкаваныя працы Л.М. Сушчэні, сярод якіх значную частку займаюць манаграфіі і навуковыя артыкулы, апублікаваныя ў перыядычных выданнях, матэрыялы канферэнцый, зборнікі навуковых прац, а таксама выданні, якія выйшлі пад рэдакцыяй вядомага вучонага. Акрамя таго, на выставе будуць прадстаўлены фотаматэрыялы з асабістага архіва Леаніда Міхайлавіча, прадастаўленыя яго калегамі, роднымі і блізкімі.
Даведка:
Леанід Міхайлавіч Сушчэня (11.11.1929, ст. Малыя Лукі Баранавіцкага р-на Брэсцкай вобл. - 19.04.2015 г.), заолаг, гідрабіёлаг. Акадэмік РАН і НАН Беларусі, доктар біялагічных наук, прафесар. Замежны член Польскай АН, Літоўскай АН. Заслужаны дзеяч навукі БССР. Скончыў Беларускі дзяржаўны ўніверсітэт (1953). З 1956 г. асістэнт кафедры заалогіі бесхрыбтовых Белдзяржуніверсітэта, з 1959 г. навуковы супрацоўнік Севастопальскай біялагічнай станцыі АН СССР, з 1964 г. загадчык аддзела фізіялогіі Інстытута біялогіі паўднёвых мораў АН УССР. З 1971 г. загадчык Аддзела заалогіі і паразіталогіі АН БССР, з 1980 г. дырэктар Інстытута заалогіі АН БССР (з 1995 г. Ганаровы дырэктар Інстытута), адначасова ў 1979-1992 гг. акадэмік-сакратар Аддзялення біялагічных наук АН Беларусі, у 1992-1997 гг. прэзідэнт Акадэміі наук Беларусі, з 1997 г. саветнік Прэзідыума НАН Беларусі, Галоўны навуковы супрацоўнік лабараторыі гідрабіялогіі НПЦ НАН Беларусі па біярэсурсах.
Аўтар больш за 200 прац, у тым ліку 8 манаграфій, па першаснай і другаснай прадукцыі вадаёмаў, экалагічнай фізіялогіі, харчаванні, дыханні, росце і балансе энергіі водных беспазваночных, ахове прыроды і навакольнага асяроддзя. З’яўляўся навуковым кіраўніком звыш 20 кандыдацкіх і доктарскіх дысертацыйных работ. Узнагароджаны ордэнамі Дружбы народаў (1986), Працоўнага Чырвонага Сцяга (1988), Айчыны III ступені (1999 г.), Дружбы (2000, РФ), Айчыны II ступені (2009), медалём імя Г. Г. Вінберга Расійскага гідрабіялагічнага таварыства (2006 ), шэрагам узнагарод Прэзідыума НАН Беларусі.