Нацыянальная акадэмія навук Беларусі

13.06.2019

Вучоныя НАН Беларусі прынялі ўдзел у прэс-канферэнцыі, прымеркаванай да Сусветнага дня барацьбы з апустыньваннем і засухай

У Нацыянальным прэс-цэнтры Рэспублікі Беларусь 13 чэрвеня 2019 г. адбылася прэс-канферэнцыя на тэму “Праблемы дэградацыі зямель з прычыны кліматычных асаблівасцей рэгіёна і дзейнасці чалавека. Эрозія і спусташэнне глеб як фактар рызыкі харчовай і эканамічнай бяспекі Беларусі”, прымеркаваная да Сусветнага дня барацьбы з апустыньваннем і засухай. Ад НАН Беларусі ў мерапрыемстве прынялі ўдзел: дырэктар Інстытута глебазнаўства і аграхіміі НАН Беларусі акадэмік Віталій Лапа, галоўны навуковы супрацоўнік Інстытута прыродакарыстання НАН Беларусі акадэмік Уладзімір Логінаў і намеснік дырэктара па навуцы Інстытута меліярацыі НАН Беларусі Аляксандр Анжэнкаў.

Віталій Лапа расказаў аб прымаемых у Беларусі мерах па адаптацыі сельскай гаспадаркі да кліматычных змен і павышэнні ўрадлівасці глеб. “У Беларусі з першых дзён незалежнасці пытанне павышэння ўрадлівасці глеб стала адным з галоўных дзяржаўных прыярытэтаў. За кошт дзяржаўнага бюджэту праводзіцца вапнаванне кіслых глеб, набываюцца мінеральныя ўгнаенні, захоўваецца сістэма дзяржаўнага кантролю за станам зямель. І з 1995 года ў рэспубліцы адзначаецца станоўчая ўстойлівая дынаміка павышэння запасаў элементаў жыўлення ў глебах, падтрымліваецца баланс гумусу”, – адзначыў Віталій Лапа.

Уладзімір Логінаў выказаў меркаванне, што на змяненне клімату вялікі ўплыў мае ўплыў сусветнага акіяна, які праз вадзяную пару можа рэгуляваць тэмпературу. Разам з тым, “павелічэнне парніковых газаў сапраўды прыводзіць да росту тэмпературы паветра, але роля гэтага фактару перабольшаная. Мы прыйшлі да парадаксальных высноў і па-іншаму зірнулі на прыроду пацяплення”, – сказаў Уладзімір Логінаў.

Аляксандр Анжэнкаў расказаў аб эканамічных і экалагічных эфектах праведзенай у рэспубліцы маштабнай асушальнай меліярацыі, мэтазгоднасці выкарыстання арашальных сістэм у сельскай гаспадарцы, а таксама аб кліматычных тэндэнцыях, якія назіраюцца на нашых землях. Трэцюю частку раслінаводчай прадукцыі і больш за 60% усіх зялёных кармоў для галіны жывёлагадоўлі ў Беларусі атрымліваюць з меліяраваных зямель, адзначыў Аляксандр Анжэнкаў.