Bel   ·  Eng  ·  Rus  |    Толькі тэкст  |   НАНБ в Facebook НАНБ в Vkontakte НАНБ в Twitter НАНБ в Instagram НАНБ в Youtube НАНБ в LinkedIn НАНБ в SlideShare rss-лента новостей Написать письмо 
   
Афiцыйны iнтэрнет-партал Прэзiдэнта Рэспублiкi Беларусь
Афiцыйны iнтэрнет-сайт Савета Міністраў Рэспублікі Беларусь
Акадэмія кіравання пры Прэзідэнце Рэспублікі Беларусь
Інтэрнет-партал Моладзь Беларусі
Газета Навука
Часопіс Навука і інавацыі

Навіны

Галоўная старонка / Навіны / Архіў навін

RSS

21.12.2015

Праект робататэхнічны канструктар RoboCake стаў пераможцам на кірмашы інавацыйных ідэй у Мінску

Праект Абяднанага інстытута праблем інфарматыкі “Навучальны робататэхнічны канструктар RoboCake” (аўтары - Пракаповіч Рыгор Аляксандравіч, Герасюта Сяргей Леанідавіч, Сыўчоў Уладзіслаў Анатольевіч) перамог на кірмашы інавацыйных ідэй у Мінску ў намінацыі “Лепшы інавацыйны праект для рэалізацыі ў ТАА ”Мінскі гарадскі тэхнапарк”. Урачыстая цырымонія ўзнагароджання адбылася 18 снежня 2015 года ў Парку высокіх тэхналогій. Акрамя таго, ТАА “Мінскі гарадскі тэхнапарк” па выніках кірмашу прыняло рашэнне аб размяшчэнні на сваіх плошчах праекта “Навучальны робататэхнічны канструктар RoboCake”.


21.12.2015

Інстытут гісторыі НАН Беларусі заключыў пагадненне аб навуковым супрацоўніцтве з Музеем "Замкавы комплекс "Мір"

18 снежня 2015 г. Інстытут гісторыі НАН Беларусі заключыў пагадненне аб навуковым супрацоўніцтве з Музеем “Замкавы комплекс “Мір”. Дагавор падпісалі дырэктар Інстытута Даніловіч В.В. і дырэктар Музея "Замкавы комплекс” Мір” Папко А.М. ва ўрачыстай абстаноўцы ў “Партрэтнай зале” адноўленага замка XVI стагоддзя. Падпісанне было прымеркавана да святкавання 15-годдзя ўключэння Мірскага замка ў Спіс сусветнай спадчыны ЮНЕСКА і 5-годдзя адкрыцця пастаяннай экспазіцыі музея.
На ўрачыстым пасяджэнні за шматгадовую плённую навукова-даследчую дзейнасць па вывучэнни і папулярызацыі гісторыка-культурнай спадчыны краіны падзякамі Інстытута гісторыі былі ўзнагароджаны супрацоўнікі замкавага комплексу, а навукоўцы Інстытута Анастасія Скеп’ян і Аляксей Шаланда - падзячнымі лістамі Музея. Інстытут гісторыі НАН Беларусі перадаў для часовага экспанавання ў Музеі ўнікальныя археалагічныя артэфакты, сярод якіх арыгінальны фаянсавы посуд XVIII стагоддзя Свержанскай мануфактуры, а таксама мартырная бомба (вага 50 кг, дыяметр - 30 см) XVII-XVIII стст.

18.12.2015

Ці асцерагацца беларусам ГМА - абмяркуюць на навукова-практычным семінары ў НАН Беларусі

Ці ёсць генна-мадыфікаваныя арганізмы (ГМА) у прадуктах харчавання, якія паступаюць на рынкі Рэспублікі Беларусь? Якія прадукты падлягаюць кантролю? Як адбываецца кантроль якасці і бяспекі прадуктаў харчавання ў нашай краіне? Гэтыя і іншыя пытанні будуць абмяркоўваць удзельнікі Рэспубліканскага навукова-практычнага семінара па дэтэкцыі ГМА.
Інстытут генетыкі і цыталогіі НАН Беларусі, які выконвае функцыі Нацыянальнага каардынацыйнага цэнтра біябяспекі (НКЦБ), арганізуе Рэспубліканскі навукова-практычны семінар для экспертаў Рэспублікі Беларусь, якія забяспечваюць бяспеку генна-інжынернай дзейнасці. Дадзены семінар праводзіцца ў рамках праекта міжнароднай тэхнічнай дапамогі ЮНЭП-ГЭФ “Падтрымка падрыхтоўкі Трэцяга нацыянальнага даклада па біябяспецы да Картахенскага пратакола па біябяспецы - рэгіёны Лацінскай Амерыкі, Карыбскія астравы, рэгіёны Цэнтральнай і Усходняй Еўропы”.

16.12.2015

НАН Беларусі і Алфёраўскі фонд назвалі пераможцаў конкурсу для маладых навукоўцаў 2015

Рашэннем Бюро Прэзідыума НАН Беларусі па ўзгадненні з кіраўніцтвам Алфёраўскага фонду Прэмія Нацыянальнай акадэміі навук і Фонду падтрымкі адукацыі і навукі (Алфёраўскага фонду) для маладых вучоных у 2015 годзе ў галіне біялогіі, хіміі, медыцыны, аграрных навук і навук аб Зямлі прысуджана загадчыку лабараторыі дзяржаўнай навуковай установы “Інстытут агульнай і неарганічнай хіміі Нацыянальнай акадэміі навук Беларусі”, кандыдату хімічных навук Іванцу Андрэю Іванавічу. Малады беларускі вучоны атрымаў пры тайным галасаванні камісіі абсалютную большасць галасоў за працу “Атрыманне і ўласцівасці сарбцыйна-каталітычных і мембранных матэрыялаў для ачысткі вады”.
Усяго для ўдзелу ў конкурсе былі вылучаны вядомымі вучонымі Беларусі шэсць кандыдатур маладых вучоных, працы якіх атрымалі прызнанне не толькі ў нашай краіне, але і за мяжой. Прэмія будзе ўручана ад імя заснавальнікаў напярэдадні Дня беларускай навукі.

15.12.2015

Уладзімір Гусакоў: семінар па навукова-тэхнічным супрацоўніцтве з ЗША, які адкрыўся ў НАН Беларусі, - знакавая падзея для нашых краін

15 снежня 2015 года ў НАН Беларусі пачалася праца беларуска-амерыканскага семінара па навукова-тэхнічным супрацоўніцтве. З беларускага боку ў семінары бярэ ўдзел група кіраўнікоў буйных арганізацый у галіне навукі і вытворчасці, кіраўнікоў навукова-тэхнічных праектаў.
Адкрываючы семінар, Старшыня Прэзідыума НАН Беларусі Уладзімір Рыгоравіч Гусакоў назваў дадзенае мерапрыемства “знакавай падзеяй для нашых акадэмій, нашай навуковай супольнасці і нашых краін”. НАН Беларусі звязвае дадзены семінар з добрымі перспектывамі супрацоўніцтва з амерыканскім бокам і адкрыта да ўзаемадзеяння па ўсіх напрамках: “Мы гатовы прадставіць і паказаць нашы вынікі, нашы інстытуты, лабараторыі, каб вы пераканаліся, што беларуская навука мае добрыя напрацоўкі, і мае добры патэнцыял для супрацоўніцтва”, адзначыў Уладзімір Гусакоў.

14.12.2015

Пачаўся візіт дэлегацыі навуковых колаў ЗША ў НАН Беларусі

Дэлегацыя навуковых колаў Злучаных Штатаў Амерыкі наведвае Нацыянальную акадэмію навук Беларусі 13-18 снежня. Сёння з гасцямі правялі сустрэчу Старшыня Прэзідыума НАН Беларусі Уладзімір Рыгоравіч Гусакоў, прадстаўнікі аддзяленняў і інстытутаў НАН Беларусі.
Уладзімір Гусакоў пацвердзіў намер супрацоўнічаць у якасці раўнапраўных партнёраў з навуковымі калегамі з ЗША. Старшыня Прэзідыума НАН Беларусі адзначыў, што ўжо былі паспяхова выкананы сумесныя праекты вучоных дзвюх краін - у 2013 годзе было рэалізавана 8 сумесных праектаў, у 2014-м - 5. У бягучым годзе таксама прадугледжана выкананне шэрагу праектаў, у прыватнасці, у галіне лазернай фізікі, матэрыялазнаўства, перапрацоўкі адходаў, біятэхналогій, па лініі Батанічнага саду і інш.

12.12.2015

У Інстытуце радыебіялогіі НАН Беларусі 3-4 снежня прайшла Рэспубліканская навукова-практычная канферэнцыя “Радыяцыя, экалогія і тэхнасфера”

У працы Рэспубліканскай навукова-практычнай канферэнцыі “Радыяцыя, экалогія і тэхнасфера” прынялі ўдзел супрацоўнікі Інстытута радыебіялогіі НАН Беларусі, Міжнароднага дзяржаўнага экалагічнага інстытута імя А.Д. Сахарава БДУ, Інстытута лесу НАН Беларусі; БНТУ, БДУІР; БДТУ; ГДУ імя Ф.Скарыны.
Дырэктар Інстытута радыебіялогіі Ігар Чэшык правёў прэзентацыю міжнароднага навуковага цэнтра мінімізацыі радыяцыйных рызык, створанага ў 2015 годзе на базе Інстытута радыебіялогіі НАН Беларусі, і прадставіў мэты, задачы і перспектывы развіцця цэнтра. Сярод асноўных перспектыў: распрацоўка і ўдасканаленне метадаў ацэнкі рызык тэхнагеннага і радыяцыйнага ўздзеяння на біёты і чалавека; распрацоўка метадаў кіравання рызыкамі з дапамогай тэхналогій рэабілітацыі тэхнагенна парушаных тэрыторый, сродкаў і спосабаў павышэння рэзістэнтнасці арганізма да неспрыяльных фактараў.

11.12.2015

У НАН Беларусі пройдзе першы Беларуска-амерыканскі семінар па навукова-тэхнічным супрацоўніцтве

13 - 18 снежня 2015 года адбудзецца візіт у Нацыянальную акадэмію навук Беларусі дэлегацыі навуковых колаў Злучаных Штатаў Амерыкі. Мэта візіту - удзел у першым Беларуска-амерыканскім семінары па навукова-тэхнічным супрацоўніцтве, правядзенне перагавораў з кіраўніцтвам НАН Беларусі аб перспектыўных напрамках беларуска-амерыканскага супрацоўніцтва ў галіне навукі і адукацыі і механізмах іх рэалізацыі.
Дамоўленасці аб правядзенні семінара былі дасягнуты ў рамках перагавораў у верасні 2014 года у ходзе візіту ў НАН Беларусі дэлегацыі Нацыянальных акадэмій ЗША і ў красавіку 2015 года падчас візіту ў НАН Беларусі дэлегацыі Нацыянальнай акадэміі навук ЗША па пытаннях навукі і адукацыі.

11.12.2015

Падпісаны дакументы аб супрацоўніцтве па лініі Акадэмій навук Беларусі і Туркменістана

10 снежня 2015 года Беларусь і Туркменістан падпісалі дарожную карту супрацоўніцтва на 2016-2017 гады. Падпісанне дакумента адбылося падчас афіцыйнага візіту Прэзідэнта Рэспублікі Беларусь Аляксандра Лукашэнкі ў Туркменістан. Дакумент падпісалі прэзідэнты дзвюх краін Аляксандр Лукашэнка і Гурбангулы Бердымухамедаў. Акрамя таго, падпісаны дакументы аб супрацоўніцтве ў харчовай і лёгкай прамысловасці, па лініі Акадэмій навук дзвюх краін. Дагавор аб навукова-тэхнічным супрацоўніцтве заключаны паміж Цэнтрам тэхналогій Акадэміі навук Туркменістана і Інстытутам генетыкі і цыталогіі Нацыянальнай акадэміі навук Беларусі. Інстытутам хіміі АН Туркменістана і інстытутам хіміі новых матэрыялаў НАН Беларусі падпісана палажэнне аб сумеснай лабараторыі па вытворчасці хімічнай прадукцыі.

10.12.2015

У НАН Беларусі падвялі вынікі Міжнароднай прамысловай выставы «Expo-Russia Belarus»

У ходзе работы Міжнароднай прамысловай выставы «Expo-Russia Belarus» арганізацыі НАН Беларусі падпісалі 5 кантрактаў на пастаўку высокатэхналагічнай прадукцыі, заключылі 5 дагавораў аб навуковым і навукова-тэхнічным супрацоўніцтве з навуковымі і прамысловымі арганізацыямі Расійскай Федэрацыі.
У паслявыставачным перыядзе арганізацыі НАН Беларусі праводзяць работу па камерцыялізацыі дасягнутых па выніках перагавораў дамоўленасцей. За прадстаўленыя на выставе распрацоўкі арганізацыі Нацыянальнай акадэміі навук Беларусі ўзнагароджаны дыпломамі, ДНУ «Цэнтр сістэмнага аналізу і стратэгічных даследаванняў Нацыянальнай акадэміі навук Беларусі» узнагароджаны дыпломам «за арганізацыю калектыўнай экспазіцыі устаноў НАН Беларусі».

09.12.2015

Падпісана дарожная карта развіцця супрацоўніцтва паміж акадэміямі навук Беларусі і В’етнама

9 снежня 2015 года Беларусь і В’етнам падпісалі праграму супрацоўніцтва ў эканамічнай, навуковай, адукацыйнай і культурнай сферах на перыяд 2016-2018 гадоў. Падпісанне дакумента адбылося падчас афіцыйнага візіту Прэзідэнта Рэспублікі Беларусь Аляксандра Лукашэнкі ў Сацыялістычную Рэспубліку В’етнам. Дакумент падпісалі прэзідэнты дзвюх краін Аляксандр Лукашэнка і Чыонг Тан Шанг. Таксама ў ходзе візіту быў падпісаны шэраг дакументаў на міжведамасным узроўні. У прыватнасці, дарожная карта развіцця супрацоўніцтва паміж акадэміямі навук дзвюх краін.

09.12.2015

У БелСГБ да 1 лютага адкрыты доступ да рэсурсаў CABI па сельскай гаспадарцы і біялагічных навуках

Рэсурсы CABI (Centre for Agriculture and Biosciences International) - гэта электронныя мультымедыйныя тэматычныя калекцыі, у якіх прадстаўлена энцыклапедычная і даведачная інфармацыя (артыкулы, рэфераты, поўныя тэксты кіраўнікоў кніг, гласарыі і інш.) аб інфекцыйных захворваннях сельскагаспадарчых жывёл; таксанаміі, узнаўленні, кармленні, генетыцы рыб; аб арганізмах, якія наносяць шкоду пасевам, рэгулятарах росту і сродках абароны раслін і іншай сельскагаспадарчай і біялагічнай тэматыцы.

09.12.2015

Кіраўніцтва Нацыянальнай акадэміі навук Беларусі наведала лабараторыі МІЦ “Кампазіты Расіі”

4 снежня Першы намеснік Старшыні Прэзідыума НАН Беларусі Сяргей Чыжык і намеснік акадэміка-сакратара аддзялення фізіка-тэхнічных навук Міхаіл Хейфец наведалі лабараторыі Міжгаліновага інжынірынгавага цэнтра “Кампазіты Расіі” і абмеркавалі далейшае супрацоўніцтва ў рамках праграмы “МІР-ПЕРАМОГА”.
Кіраўніцтва цэнтра і супрацоўнікі лабараторыі паказалі гасцям найбольш цікавыя распрацоўкі найноўшых кампазіцыйных матэрыялаў.
На сустрэчы з кіраўніком МІЦ “Кампазіты Расіі” Уладзімірам Нелюбам прадстаўнікі НАН Беларусі гаварылі пра перспектывы сумесных праектаў. Галоўны з іх - праграма “МИР-ПОБЕДА” - запушчаны і паспяхова развіваецца. Мэта праграмы - распрацоўка ПА для камерцыйнага выкарыстання ў IT-індустрыі Расіі і Беларусі і працэсу імпартазамяшчэння інжынернага ПА для высокатэхналагічных вытворчасцей. “МИР-ПОБЕДА” з’яўляецца часткай праекта глабальнага інжынернага праграмнага комплексу кіравання поўным жыццёвым цыклам складанага тэхнічнага аб’екта або сістэмы.

08.12.2015

НАН Беларусі падвяла вынікі конкурсу на саісканне прэмій Нацыянальнай акадэміі навук Беларусі 2015 года

За ўклад у вырашэнне буйной навуковай або навукова-практычнай праблемы пастановай Прэзідыума Нацыянальнай акадэміі навук Беларусі ад 30 лістапада 2015 г. № 56 прэмій удастоены вядомыя вучоныя, маладыя вучоныя і студэнты. Па выніках тайнага галасавання членаў Камісіі Нацыянальнай акадэміі навук Беларусі па прэміях вырашана прысудзіць 12 прэмій Нацыянальнай акадэміі навук Беларусі; 10 прэмій Нацыянальнай акадэміі навук Беларусі імя В.Ф.Купрэвіча для маладых вучоных і 3 прэміі Нацыянальнай акадэміі навук Беларусі імя В.Ф.Купрэвіча за навуковую працу студэнтаў.
Працы дэманструюць вынікі сучасных, актуальных фундаментальных і прыкладных даследаванняў, якія прыносяць істотную аддачу ў практычнай сферы. Трэба адзначыць, што сярод лаўрэатаў - не толькі супрацоўнікі акадэмічных арганізацый, але і навукоўцы іншых міністэрстваў і ведамстваў. Усяго на конкурс, які праводзіцца раз у два гады, было прадстаўлена каля 50 работ.
Са спісам лаўрэатаў можна азнаёміцца ТУТ.

07.12.2015

У НАН Беларусі ўзнагародзілі юных даследчыкаў

7 снежня ў Нацыянальнай акадэміі навук Беларусі адбылася ўрачыстая цырымонія ўзнагароджання ўдзельнікаў гарадскога фестывалю праектна-даследчых работ вучняў пачатковых класаў “Пазнанне і творчасць”. Усяго ў мерапрыемстве прынялі ўдзел каля 200 юных даследчыкаў.
Фестываль “Пазнанне і творчасць” праводзіцца сярод навучэнцаў 2-4 класаў устаноў адукацыі сталіцы ў два этапы. Першы этап вочны (на ўзроўні ўстановы адукацыі), другі - гарадскі. Гарадскі ў сваю чаргу складаецца з двух тураў (завочнага і вочнага). Мэта мерапрыемства - стварэнне ўмоў для развіцця інтэлектуальных і творчых здольнасцей навучэнцаў І ступені агульнай сярэдняй адукацыі.
Усяго ў конкурсе 2015 года прынялі ўдзел каля 500 праектаў і вучэбна-даследчых работ па 4 намінацыях.

04.12.2015

Прайшло ўзнагароджанне лепшых дакладчыкаў Першага Еўразійскай форуму маладых вучоных - YES-Форуму

4 снежня ў НАН Беларусі завяршылася праца Першага Еўразійскага форуму маладых вучоных - YES-Форуму і штогадовай XII Міжнароднай навуковай канферэнцыі маладых вучоных “Моладзь у навуцы – 2015”. У вялікай зале Прэзідыума галоўны вучоны сакратар НАН Беларусі Аляксандр Уладзіміравіч Кільчэўскі ўзнагародзіў лепшых дакладчыкаў навуковых мерапрыемстваў, якія прайшлі.
Папярэдне плануецца, што эстафету правядзення Еўразійскага форуму маладых вучоных прыме праз два гады Казахстан.


04.12.2015

Лекцыя расійскага вучонага-касмолага Валерыя Рубакова “Загадкі Сусвету: цёмная матэрыя і цёмная энергія”

13 лістапада 2015 года ў Нацыянальнай акадэміі навук Беларусі адбылася лекцыя вядомага расійскага вучонага-касмолага Валерыя Рубакова. Яе арганізатарамі выступілі: часопіс “Навука і інавацыі” пры садзейнічанні фонду “Навука вакол нас” і НАН Беларусі. Стала даступнай відэа-версія лекцыі, якая дасць магчымасць у дэталях даведацца аб гіпотэзе вучонага адносна галоўнай загадкі фундаментальнай фізікі XXI стагоддзя - прыродзе цёмнай энергіі.


04.12.2015

Дваццаць беларускіх праектаў былі прадстаўлены 4 снежня на пітч-сесіі “Сколкава” ў Нацыянальнай акадэміі навук Беларусі

Дваццаць беларускіх праектаў былі прадстаўлены 4 снежня на пітч-сесіі “Сколкава” ў Нацыянальнай акадэміі навук Беларусі. Віцэ-прэзідэнт фонду “Сколкава”, выканаўчы дырэктар кластара ядзерных (прамысловых) тэхналогій Ігар Караваеў заслухаў кароткія прэзентацыі вучоных НАН Беларусі, якія прэтэндуюць на падтрымку фонду, адзначыў моцныя бакі праектаў і даў рэкамендацыі па далейшым ўдасканаленні ідэй і распрацовак беларускіх вучоных, якія прэтэндуюць на фінансаванне і наступную камерцыялізацыю.
Мерапрыемства прайшло ў рамках Еўразійскай форуму маладых вучоных - Yes-форуму, які завяршыў сёння сваю працу ў НАН Беларусі.


03.12.2015

У Інстытуце фізікі імя Б.І. Сцяпанава НАН Беларусі прадстаўнікам СМІ расказалі аб рэалізацыі беларускімі вучонымі праектаў і праграм Саюзнай дзяржавы

Больш за 25 прадстаўнікоў расійскіх і беларускіх СМІ прынялі ўдзел у прэс-канферэнцыі, якая прайшла 3 снежня 2015 года ў Інстытуце фізікі імя Б.І. Сцяпанава НАН Беларусі, прысвечанай рэалізацыі беларускімі вучонымі праектаў і праграм Саюзнай дзяржавы. Намеснік акадэміка-сакратара Аддзялення фізікі, матэматыкі і інфарматыкі НАН Беларусі Сяргей Аляксандравіч Ціхаміраў пазнаёміў работнікаў СМІ са структурай і складам аддзялення, расказаў аб навуковых праграмах, якія праводзяцца ў рамках Саюзнай дзяржавы. Дырэктар інстытута фізікі імя Б.І. Сцяпанава акадэмік Мікалай Станіслававіч Казак расказаў аб выкананні саюзных праграм СКІФ-Нетры і Маніторынг-СД, аб інавацыйных распрацоўках інстытута, а таксама пра перспектывы далейшага супрацоўніцтва ў рамках агульнай Саюзнай дзяржавы. Таксама журналісты змаглі пагутарыць з вучонымі непасрэдна ў навуковых лабараторыях.

03.12.2015

Намеснік Старшыні Прэзідыума НАН Беларусі Сяргей Кілін правёў перагаворы з дэлегацыяй японскіх дзелавых колаў

3 снежня 2015 г. прайшлі перагаворы намесніка Старшыні Прэзідыума НАН Беларусі Сяргея Якаўлевіча Кіліна з начальнікам аддзела продажу японскай кампаніі Toshin Kogyo Ltd. Ісіі Таканоры і кансультантам японскай кампаніі Nomura Research Institute (NRI) Труфанавым Д.В.
У ходзе перагавораў бакі абмеркавалі перспектыўныя напрамкі і механізмы супрацоўніцтва.



Новости 821 - 840 из 988
Начало | Пред. | 40 41 42 43 44 | След. | Конец
 

Галоўная старонка / Навіны / Архіў навін / Да пачатку старонкі
Пры поўным ці частковым выкарыстанні інфармацыі спасылка на крыніцу з'яўляецца абавязковай