30 кастрычніка ў менскай галерэі «Ў» адбылася вечарына памяці забітых, закатаваных, несправядліва асуджаных ў 30-я гады мінулага стагоддзя прадстаўнікоў беларускай інтэлігенцыі. Арганізатарам імпрэзы выступіў «Саюз беларускіх пісьменнікаў». На мерапрыемстве акадэмік Радзім Гаўрылавіч Гарэцкі, пляменнік растралянага ў 1937-м класіка беларускай літаратуры Максіма Гарэцкага, расказаў, як цудам застаўся жывы яго бацька Гаўрыла Гарэцкі, навуковец, адзін з заснавальнікаў Беларускай акадэміі навук.