Многія звярталі ўвагу на шыльды «Гісторыка-культурная каштоўнасць» на старых будынках. Але мала хто ведае, што гісторыка-культурная каштоўнасць павінна мець спецыяльны пашпарт – ідэнтыфікатар знешняга выгляду, стылю, архітэктурных асаблівасцей і гарант нязменнасці помніка. У ходзе працы над пашпартам часам даводзіцца адкрываць нечаканыя звесткі. Такая сітуацыя ўзнікла з капліцай у вёсцы Мінкавічы Камянецкага раёна, якая на справе аказалася не зусім капліцай і не 1899 года пабудовы. Для высвятлення пытання даследаванне было накіравана ў Цэнтр даследаванняў беларускай культуры, мовы і літаратуры НАН Беларусі.