3 мая ў Нацыянальным Прэс-цэнтры Рэспублікі Беларусь адбылася прэс-канферэнцыя на тэму: «Небяспека распаўсюджвання інвазійных відаў флоры. Барацьба з баршчэўнікам Сасноўскага, сумнікам і іншымі відамі інвазійных раслін». У якасці спікераў ад НАН Беларусі выступілі: дырэктар Інстытута эксперыментальнай батанікі Дзмітрый Грумо, загадчык сектара кадастру расліннага свету Інстытута эксперыментальнай батанікі Алег Маслоўскі і намеснік дырэктара па навуковай рабоце Інстытута аховы раслін Алена Якімовіч.

На прэс-канферэнцыі навукоўцы расказалі пра напрамкі даследаванняў у галіне інвазійных відаў флоры, спосабы рэгулявання і метады выдалення інвазійных відаў раслін, прэпараты супраць інвазійных відаў раслін, распрацаваныя ў Акадэміі навук. Як адзначыў загадчык сектара кадастру расліннага свету Інстытута эксперыментальнай батанікі НАН Беларусі, доктар біялагічных навук Алег Маслоўскі, у параўнанні з суседнімі краінамі, поспехі ў барацьбе з інвазійнымі відамі ў Беларусі даволі значныя. «Беларускія навукоўцы распрацавалі ТКП, дзе цалкам прапісаны мерапрыемствы, як змагацца з інвазійнымі відамі. Гэта не толькі ўнясенне нейкіх хімічных прэпаратаў, але і ўвесь комплекс, пачынаючы з падрыхтоўчых мерапрыемстваў, уліку плошчаў, кантролю эфектыўнасці мерапрыемстваў, і іншыя прафілактычныя меры», — сказаў Алег Маслоўскі. Намеснік дырэктара па навуковай рабоце РУП «Інстытут аховы раслін», кандыдат сельскагаспадарчых навук, дацэнт Алена Якімовіч падкрэсліла, што добрыя вынікі ў барацьбе з інвазійнымі відамі раслін у Беларусі дасягнуты за кошт таго, што навукоўцы працавалі разам. «Мы супрацоўнічалі з Інстытутам эксперыментальнай батанікі, а таксама нас падтрымлівала Міністэрства прыродных рэсурсаў і аховы навакольнага асяроддзя. Так, падтрымка калег-навукоўцаў нам дапамагла распрацаваць эфектыўныя ахоўныя мерапрыемствы па падаўленні інвазійных відаў раслін. Былі распрацаваны адпаведныя ТКП», — канстатавала Алена Якімовіч.