Уладзімір Каранік і супрацоўнікі апарату Акадэміі навук падчас рэспубліканскага суботніка ўнеслі свой уклад у добраўпарадкаванне сталіцы.
Традыцыйна, акрамя навядзення парадку на сваіх працоўных месцах, каманда НАН працавала над ператварэннем Батанічнага саду. Супрацоўнікі ачысцілі тэрыторыю ад апалай лістоты, сухіх галінак і бытавога смецця, а таксама ўпрыгожылі яе, высадзіўшы прыгожаквітнеючыя хмызнякі і садовыя ружы.
«Сённяшні дзень пачаўся ў нас з маштабнай уборкі і навядзення парадку на тэрыторыі Батанічнага саду – месца, якое так любяць мінчане і госці сталіцы, сапраўднай жамчужыны горада і каштоўнага навуковага цэнтра. Прыемна, што ў нашай краіне берагуць традыцыю суботнікаў. Для мяне гэта нешта большае, чым проста ўборка. Гэта праява клопату аб сваім родным горадзе і краіне ў цэлым, паказчык грамадзянскай актыўнасці і сваёй пазіцыі», – сказаў Уладзімір Каранік.
Ён таксама адзначыў, што падобныя мерапрыемствы дапамагаюць не толькі падтрымліваць чысціню і прыгажосць горада, але і выхоўваюць пачуццё павагі да прыроды і працы.
«Калі мы працуем разам, узнікае дзіўнае пачуццё яднання. І калі бачыш вынікі сваёй працы, то шчыра радуешся таму, як наша родная Беларусь становіцца яшчэ больш прыгожай і лепшай», – паведаміў кіраўнік Акадэміі навук.
Батанічны сад – самы буйны ў краіне цэнтр па захаванні біяразнастайнасці жывых раслін, вядучая навуковая ўстанова ў галіне інтрадукцыі, акліматызацыі, фізіялогіі, біяхіміі, біятэхналогіі і экалогіі раслін, аховы навакольнага асяроддзя. Ён належыць да ліку найбуйнейшых батанічных садоў Еўропы як па плошчы (93 га), так і па складзе калекцый раслін (больш за 15 тысяч найменняў).
