Маштабная падзея аб'яднала на адной пляцоўцы каля 300 экспертаў, навукоўцаў і практыкаў.
У пленарным пасяджэнні прымаюць удзел прадстаўнікі ключавых дзяржаўных ведамстваў, уключаючы ДКСЭ, Савет бяспекі, Канстытуцыйны Суд, Генеральную пракуратуру, Следчы камітэт, Акадэмію навук, Міністэрства юстыцыі, Сакратарыят УНС, а таксама экспертаў і спецыялістаў з Беларусі, Кітая, Расіі і Узбекістана.
З прывітальным словам да гасцей і ўдзельнікаў звярнуўся Старшыня Прэзідыума НАН Беларусі Уладзімір Каранік. Ён падкрэсліў важнасць экспертнай работы для ўмацавання правапарадку і забеспячэння бяспекі дзяржавы. Паводле яго слоў, ва ўмовах імкліва зменлівага свету, з'яўлення новых выклікаў і пагроз судовая экспертыза з'яўляецца надзейным інструментам, які забяспечвае непахіснасць законнасці і абарону дзяржаўнага суверэнітэту.
«Пытанні нацыянальнай бяспекі і правасуддзя знаходзяцца ў сферы пастаяннай увагі Прэзідэнта, усёй заканадаўчай і выканаўчай улады. Якасць правасуддзя шмат у чым вызначаецца якасцю экспертызы і з'яўляецца асновай даверу да ўлады», – сказаў Уладзімір Каранік.
Кіраўнік НАН таксама адзначыў, што на сучасным этапе імклівага развіцця навукі айчынныя даследчыкі ўсё больш актыўна працуюць на стыку розных дысцыплін. Укараненне сучасных лічбавых тэхналогій, штучнага інтэлекту і новых метадаў істотна трансфармуе падыходы да судова-экспертнай работы.
Тым не менш, нягледзячы на тэхнічны прагрэс, нязменным застаецца непарушны прынцып аб'ектыўнасці і дакладнасці ў рабоце экспертаў.
«Супрацоўніцтва з вучонымі НАН Беларусі актыўна развіваецца. Кожны вынік выканання сумесных навуковых даследаванняў з'яўляецца базавай платформай для пастаноўкі і вырашэння новых задач і распрацоўкі найбольш эфектыўных тэхналагічных рашэнняў, – сказаў Уладзімір Каранік. – Акадэмія навук выказвае гатоўнасць да фарміравання пастаянна дзеючай платформы аператыўнага абмену інфармацыяй аб новых відах экспертных даследаванняў, распрацоўцы і гарманізацыі агульных стандартаў і пратаколаў, што забяспечыць узаемнае прызнанне вынікаў экспертыз на міждзяржаўным узроўні».
Ад імя НАН ён пажадаў усім удзельнікам паспяховай работы, змястоўных дыскусій і новых прафесійных дасягненняў і павіншаваў усіх прысутных з Днём народнага адзінства.
