Першы намеснік Старшыні Прэзідыума НАН Беларусі Віталь Залескі абмеркаваў у Чунцыне стварэнне сумеснай лабараторыі ў рамках ініцыятывы «Пояс і шлях»
У цэнтры ўвагі – пытанні развіцця высокатэхналагічнага двухбаковага партнёрства.
На сустрэчы прысутнічалі прадстаўнікі ключавых дзяржаўных, навуковых і прамысловых структур: намеснік Дэпартамента навукі і тэхналогій горада Чунцын, намеснік генеральнага дырэктара Чунцынскага машынабудаўніча-электратэхнічнага холдынга (групы кампаній) «Цзідзянь», дырэктар Чунцынскага навукова-даследчага інстытута Харбінскага політэхнічнага ўніверсітэта (ХПУ) і кіраўнікі лабараторый Інстытута электрамеханічнай інжынерыі Харбінскага політэхнічнага ўніверсітэта.
Бакі дэталёва абмеркавалі дарожную карту праекта і ўмовы падачы заяўкі на профільны конкурс.
З беларускага боку ў праекце мяркуецца ўдзел Фізіка-тэхнічнага інстытута, Аб'яднанага інстытута машынабудавання, Інстытута хіміі новых матэрыялаў і НПЦ па матэрыялазнаўстве.
З кітайскага – Харбінскага політэхнічнага ўніверсітэта, Чунцынскага навукова-даследчага інстытута ХПУ і холдынга «Цзідзянь».
Асноўная мэта будучай лабараторыі – інавацыйныя распрацоўкі для машынабудавання і авіяцыйнай галіны.
Навукоўцы плануюць засяродзіцца на павышэнні рэсурсу і канкурэнтаздольнасці складаных вырабаў: ад помпавага абсталявання да рэдуктараў і сістэм пераўтварэння энергіі.
У бліжэйшы час будзе падрыхтаваны пакет неабходных дакументаў для ўдзелу ў конкурсе на стварэнне сумеснай лабараторыі «Пояс і шлях». Гэта стане важным крокам у паглыбленні навукова-тэхналагічнага ўзаемадзеяння паміж Беларуссю і Кітаем.
