Інстытут радыебіялогіі НАН Беларусі ўдастоены Ганаровай граматы Савета Міністраў Рэспублікі Беларусь “За значны ўклад інстытута ў пераадоленне наступстваў катастрофы на Чарнобыльскай АЭС і рэабілітацыю пацярпелых тэрыторый, выкананне праектаў, накіраваных на атрыманне новых фундаментальных і прыкладных вынікаў у галіне радыяцыйнай абароны, аховы здароўя і прыродаахоўнай дзейнасці”. Ганаровую грамату дырэктару Інстытута Ігару Чэшыку ўручыў 22 ліпеня у час візіту ў г. Гомель намеснік старшыні Прэзідыума НАН Беларусі акадэмік Аляксандр Васільевіч Сукала.

Працы вучоных інстытута запатрабаваны ў навуковым свеце. Гэтаму ў немалой ступені спрыяе той факт, што назапашаны ў Інстытуце вопыт не толькі ўнікальны і не мае аналагаў, але і ўвесь час развіваецца, у тым ліку на базе прыцягнення арсенала і метадалогіі сумежных навук, творчага падыходу да эксперыменту і глыбокай эрудыцыі спецыялістаў. У цяперашні час інстытут удзельнічае ў навуковых праграмах усіх узроўняў і вядзе актыўную міжнародную дзейнасць.

Больш за 10 гадоў таму ДНУ “Інстытут радыебіялогіі Нацыянальнай акадэміі навук Беларусі” была пераведзена ў Гомель – цэнтр рэгіёна, найбольш пацярпелага ад Чарнобыльскай атамнай катастрофы. Асноўнай мэтай гэтага пераезду была канцэнтрацыя навуковых кадраў і профільных даследаванняў з мэтай дамагчыся найбольш эфектыўнага пераадолення аддаленых наступстваў катастрофы. За гэтыя гады кіраўніцтвам і калектывам нямала зроблена для таго, каб інстытут стаў адным з найважнейшых элементаў навукова-інавацыйнай інфраструктуры рэгіёна. Напрамак, звязаны з радыебіялагічнымі, радыеэкалагічнымі і радыемедыцынскімі аспектамі агульнанавуковай праблематыкі, увайшоў у лік прыярытэтных і да гэтага часу захоўвае выключную значнасць для краіны і вобласці.