З 26 па 28 верасня 2016 г. дэлегацыя Нацыянальнай акадэміі навук Беларусі пад кіраўніцтвам Першага намесніка Старшыні Прэзідыума НАН Беларусі С.А.Чыжыка знаходзілася з візітам у г. Парыжы (Францыя). Візіт адбыўся па запрашэнні Прэзідэнта Французскай акадэміі навук Бернара Мёнье. У ходзе візіту дэлегацыя прыняла ўдзел ва ўрачыстых мерапрыемствах з нагоды 350-годдзя Французскай акадэміі навук і правяла перагаворы аб перспектыўных напрамках развіцця супрацоўніцтва з прадстаўнікамі замежных акадэмій навук і міжакадэмічных міжнародных навуковых аб’яднанняў.

Падчас цырымоніі адкрыцця, якая праходзіла ў канцэртнай зале музея Луўр, прадстаўнікі замежных акадэмій навук былі ўзнагароджаны памятнымі медалямі, а таксама падпісалі Маніфест аб навуцы. З нагоды памятнай даты мерапрыемства наведаў Прэзідэнт Французскай Рэспублікі Франсуа Аланд.

Усяго ў праграме мерапрыемстваў прымалі ўдзел прадстаўнікі Акадэмій навук з 54 краін свету.

З шэрагам прадстаўнікоў Акадэмій навук дэлегацыя НАН Беларусі правяла асобныя перагаворы аб магчымых напрамках узаемавыгаднага супрацоўніцтва і механізмах яго пашырэння.

У ходзе праграмы знаходжання члены дэлегацыі НАН Беларусі азнаёміліся з дакладамі прадстаўнікоў шэрагу акадэмій навук па актуальных праблемах сучаснасці на канферэнцыі “Чатыры перакрыжаваных погляды на праблемы будучыні”.