29 мая 2017 года ў Пасольстве Рэспублікі Беларусь у Кітайскай Народнай Рэспубліцы адбылася сустрэча з удзельнікамі 40-й Кансультатыўнай нарады па Дагаворы аб Антарктыцы (КСДА) - начальнікам усіх дзевяці беларускіх антарктычных экспедыцый Гайдашовым Аляксеем Аляксандравічам і начальнікам Рэспубліканскага цэнтра палярных даследаванняў Пільшчыкавым Ігарам Міхайлавічам.

Гайдашоў А.А. расказаў пра гісторыю ўдзелу Беларусі ў даследаваннях Антарктыкі, стварэнні беларускай антарктычнай станцыі, а таксама аб асноўных напрамках навуковай працы ў Антарктыдзе. Увазе слухачоў былі прадэманстраваны дакументальныя відэафільмы, знятыя А.А. Гайдашовым падчас антарктычных экспедыцый.

У інтэрв’ю інфармацыйнаму агенцтву “Сіньхуа” А.А. Гайдашоў расказаў аб узаемадзеянні беларускіх вучоных-палярнікаў з калегамі з Кітая і іншых краін.

У сустрэчы прынялі ўдзел супрацоўнікі пасольства, члены іх сем’яў, студэнты ВНУ Пекіна і Шанхая.

На памяць аб сустрэчы ў Пасольстве А.А. Гайдашоў і І.М. Пільшчыкаў перадалі паслу Кірылу Рудому ў дар кнігу “Беларусь у Антарктыцы”, выдадзеную Нацыянальнай акадэміяй навук Беларусі да 10-годдзя пачатку рэгулярных навуковых і экспедыцыйных даследаванняў.

Па матэрыялах сайта china.mfa.gov.by