20 сакавіка 2018 года ў Інстытуце генетыкі і цыталогіі НАН Беларусі адбыўся міжнародны семінар “Прэдыктыўнае генетычнае тэсціраванне як неабходны этап сучаснай медыцыны”. У ходзе семінара вучоныя і медыкі абмеркавалі праблемы генетычных аспектаў захворванняў тромбагеннага характару, практычнае прымяненне малекулярна-генетычнага тэсціравання ў кардыялогіі, ДНК-дыягностыку пры гіпертрафічнай кардыяміяпатыі, вопыт прымянення генетычнай дыягностыкі і тэрапіі сасудзістых захворванняў і іншыя пытанні.

Адкрываючы семінар, галоўны вучоны сакратар НАН Беларусі, акадэмік Аляксандр Кільчэўскі адзначыў, што ў Інстытуце генетыкі і цыталогіі ўжо сфарміравалася добрая традыцыя праводзіць семінары сумесна з медыкамі, “таму што даследаванні акадэміі не павінны ляжаць на паліцы, а павінны працаваць на беларускую медыцыну і рэзаніраваць ў навуковай супольнасці як Беларусі, так і ўсяго свету. Таму сённяшні семінар пацвярджае нашы намеры супрацоўнічаць з медыкамі ў такой актуальнай галіне як сардэчна-сасудзістыя захворванні”, падкрэсліў Аляксандр Кільчэўскі.

Дырэктар Інстытут генетыкі і цыталогіі НАН Беларусі Валянціна Лемеш расказала, што Інстытут генетыкі і цыталогіі актыўна супрацоўнічае з медыцынскімі арганізацыямі рэспублікі. Вынікі гэтага супрацоўніцтва і выкананых сумесных праектаў будуць асветлены на дадзеным семінары.

Удзельнікі семінара выказалі ўпэўненасць у тым, што праведзеныя своечасова генетычныя даследаванні могуць дапамагчы скарэкціраваць лад жыцця з мэтай пазбягання ўплыву асяроддзевых фактараў рызыкі і тым самым прадухіліць шматлікія захворванні. У генетыцы маецца высокі патэнцыял для прафілактыкі і лячэння многіх захворванняў, у тым ліку сардэчна-сасудзістых. Своечасовае выяўленне схільнасці да захворванняў дазваляе своечасова прыняць прафілактычныя меры, прадухіліць развіццё або палегчыць працяг захворвання, і прымяняць тэрапію з улікам індывідуальных асаблівасцей чалавека.