Разважанні пра лёс Любчанскага замка. Сёлета ў красавіку адбылося чарговае справаздачнае пасяджэнне фонду «Любчанскі замак». У сваім выступе начальнік Упраўлення па ахове гісторыка-культурнай спадчыны Міністэрства культуры І. Чарняўскі падняў пытанне пра ўсталяванне купала на Брамную вежу. Не першы год вежа мае толькі часовы дах. Ігар Мяфодзьевіч адзначыў, што Міністэрства культуры задаволенае прадстаўленымі прапорцыямі купала і паказаў падрыхтаваны Праўленнем ліст фармату А4 узгаднення гэтых прапорцыяў з Нацыянальнай акадэміяй навук. Аднак ён падкрэсліў, што гэтага яўна недастаткова для пачатку працы, і Праўленне фонду павіннае прадаставіць адпаведнае абгрунтаванне і праектную дакументацыю па купале для яе зацвярджэння.