22 студзеня 2021 года ў НАН Беларусі пад кіраўніцтвам Старшыні Прэзідыума НАН Беларусі Уладзіміра Гусакова адбылося пасяджэнне Рэспубліканскай міжведамаснай рабочай групы па пераадоленні COVID-19. У яе рабоце прынялі ўдзел вядучыя вучоныя Акадэміі навук, прадстаўнікі Міністэрства аховы здароўя і Міністэрства адукацыі. Спецыялісты абмеркавалі актуальныя пытанні выкарыстання малекулярна-генетычных метадаў дыягностыкі і лячэння пацыентаў з інфекцыйнай паталогіяй, уключаючы COVID-19, эфектыўнасці айчынных тэст-сістэм па ідэнтыфікацыі ўзбуджальнікаў, прааналізавалі навуковыя даныя пра генетычную разнастайнасць каронавіруса SARS-CoV-2, што цыркулюе ў розных рэгіёнах свету, і яго асаблівасцях у Рэспубліцы Беларусь. У ходзе пасяджэння ўздымаліся пытанні, звязаныя з асаблівасцямі паўторнага заражэння каронавіруснай інфекцыяй, верагоднасцю развіцця аддаленых ускладненняў, наступствамі вакцынацыі, перспектывамі стварэння айчыннай вакцыны, эпідэміялагічнымі характарыстыкамі каронавіруса, зарэгістраванага ў пацыентаў у Рэспубліцы Беларусь. Удзельнікі абмеркавалі вынікі супрацоўніцтва вядучых вучоных Нацыянальнай акадэміі навук Беларусі і Беларускага дзяржаўнага медыцынскага ўніверсітэта, Беларускай акадэміі паслядыпломнай адукацыі па ўкараненні клетачных тэхналогій у медыцынскую практыку.
У рамках пасяджэння Рэспубліканскай міжведамаснай рабочай групы па пераадоленні COVID-19 адбылося падпісанне пагаднення аб супрацоўніцтве паміж НАН Беларусі і УА «Беларускі дзяржаўны медыцынскі ўніверсітэт». Подпісы пад дакументам паставілі Старшыня Прэзідыума НАН Беларусі Уладзімір Гусакоў і рэктар Беларускага дзяржаўнага медыцынскага ўніверсітэта Сяргей Рубніковіч. Пагадненне прадугледжвае ўстанаўленне ўсебаковага ўзаемавыгаднага супрацоўніцтва паміж БДМУ і арганізацыямі, падпарадкаванымі НАН Беларусі, накіраванага на інтэграцыю акадэмічнай і ўніверсітэцкай навукі па прыярытэтных напрамках навуковых даследаванняў і навукова-тэхнічнай дзейнасці. Вучоныя плануюць праводзіць сумесныя навуковыя даследаванні ў рамках дзяржаўных, галіновых і рэгіянальных навуковых і навукова-тэхнічных праграм, развіваць навуковыя даследаванні, якія грунтуюцца на тэхналогіях V і VI тэхналагічных укладаў, сумесна ўдзельнічаць у міжнародных праграмах і праектах, навукова-тэхнічных мерапрыемствах і выставах, павышаць якасць адукацыі на І і ІІ ступенях вышэйшай адукацыі, а таксама эфектыўнасць падрыхтоўкі кадраў вышэйшай навуковай кваліфікацыі.
Рэспубліканская міжведамасная рабочая група па пераадоленні COVID-19 была створана Пастановай Бюро Прэзідыума НАН Беларусі ад 18 мая 2020 года № 223. У яе ўвайшлі больш за 30 спецыялістаў, якія прадстаўляюць акадэмічную і ўніверсітэцкую навуку: вядучыя вучоныя НАН Беларусі, Міністэрства аховы здароўя, Міністэрства адукацыі, медыкі-практыкі арганізацый сістэмы аховы здароўя краіны. Мэта Міжведамаснай групы – арганізацыя і каардынацыя дзейнасці вучоных і медыцынскіх работнікаў усёй краіны па практычнай рэалізацыі комплексаў мерапрыемстваў па пераадоленні каронавіруса.
