НАН Беларусі працягвае цыкл мерапрыемстваў, прысвечаных 100-годдзю Інбелкульта і 100-годдзю беларускай акадэмічнай навукі. 20 кастрычніка 2021 года (серада) у 15.00 у Інстытуце мовазнаўства імя Якуба Коласа НАН Беларусі (вул. Сурганава, д. 1, корп. 2, трэці паверх, каб. 302) адбудзецца Круглы стол “100 гадоў беларускай нацыянальнай лексікаграфіі: ад Інбелкульта да сучаснасці”, прысвечаны 100-годдзю Слоўнікавай камісіі. Мерапрыемства прымеркавана да юбілею Інстытута беларускай культуры.

У лютым 1921 года пры Наркамаце асветы БССР была створана Слоўнікавая (навукова-тэрміналагічная) камісія, у задачы якой уваходзіла распрацоўка навуковай тэрміналогіі на беларускай мове і стварэнне першага нацыянальнага фундаментальнага акадэмічнага навуковага слоўніка. 30 студзеня 1922 года іменна на базе Слоўнікавай камісіі быў утвораны Інстытут беларускай культуры. «Слоўнік жывой беларускай мовы»  грандыёзны лексікаграфічны праект пачатку ХХ стагоддзя, які мае вялізнае значэнне для сучаснай лексікаграфічнай практыкі.

Дзейнасць Слоўнікавай камісіі пакуль яшчэ не вывучана і не ацэнена ў поўнай меры. Яна патрабуе пераасэнсавання і папулярызацыі. На Круглым стале будзе разглядацца арганізацыя работы Слоўнікавай камісіі і этапы падрыхтоўкі да ўкладання слоўніка, што дазволілі атрымаць такія значныя вынікі. Асаблівая ўвага будзе скіравана на дзейнасць краязнаўчых арганізацый, характарыстыку іх удзелу ў зборы, апрацоўцы дыялектных матэрыялаў і падрыхтоўцы на іх аснове дыялектных краёвых слоўнікаў. Плануецца знаёмства з асобай і біяграфіяй Сцяпана Некрашэвіча і абмеркаванне пераемнасці паміж слоўнікавымі выданнямі Інбелкульта і сучаснымі працамі ў галіне нацыянальнай лексікаграфіі.

Запрашаем усіх жадаючых да ўдзелу ў Круглым стале!