23 снежня 2021 года пярвічная арганізацыя ГА «Беларускі саюз жанчын» НАН Беларусі далучылася да Рэспубліканскай навагодняй дабрачыннай акцыі «Нашы дзеці».

На ўрачыстасць у Акадэмію навук былі запрошаны сем’і, якія выхоўваюць дзяцей, хворых на фенілкетанурыю. Са словамі віншаванняў і добрых пажаданняў да гасцей звярнуліся Юлія Качурка, якая ўзначальвае пярвічную арганізацыю БСЖ, начальнік Упраўлення навукова-арганізацыйнай і прававой работы апарата НАН Беларусі, Алена Маргунова, намеснік генеральнага дырэктара па стандартызацыі і якасці прадуктаў харчавання НПЦ НАН Беларусі па харчаванні. Усім гасцям былі ўручаны падарункі ад НПЦ НАН Беларусі па харчаванні – наборы спецыялізаваных безбялковых прадуктаў харчавання. Бацькі хворых дзетак выказалі гарачыя словы ўдзячнасці за тое, што вучоныя аказваюць дапамогу такім сем’ям і не пакідаюць без увагі іх праблемы.

Госці наведалі музей гісторыі НАН Беларусі, а напярэдадні сем’і пабывалі на вытворчасці падораных ім прадуктаў.

Як вядома, адзін з напрамкаў, якім займаецца цэнтр, - стварэнне спецыялізаванай прадукцыі для пэўнай катэгорыі насельніцтва, якой патрабуюцца спецыяльныя дыеты. Адна з апошніх распрацовак – прадукты харчавання для хворых на фенілкетанурыю. Арганізавана і спецыялізаваная вытворчасць.

Фенілкетанурыя – спадчыннае захворванне, пры якім парушэнне абмену амінакіслот прыводзіць да іх намнажэння ў клетках арганізма. У Беларусі налічваецца каля 1 тысячы хворых на фенілкетанурыю, трэць з іх – дзеці. Для паспяховага дзеяння лекавых прэпаратаў у людзей з гэтым захворваннем патрабуецца жорсткае планаванне і абмежаванае ўжыванне бялковай ежы.