28 верасня 2022 года Старшыня Прэзідыума НАН Беларусі Уладзімір Гусакоў прыняў удзел у расійска-беларускім экспертна-медыйным форуме «Прамысловае і тэхналагічнае супрацоўніцтва Расіі і Беларусі. Навука. Космас. Адукацыя» ў Маскве, арганізаваным Пастаянным камітэтам Саюзнай дзяржавы на пляцоўцы прэс-цэнтра «Расія сёння» з удзелам прадстаўнікоў НАН Беларусі ў рэжыме відэа-канферэнц-сувязі.

Уладзімір Гусакоў выступіў з дакладам «Узаемадзеянне Беларусі і Расіі ў рамках навукова-тэхнічных праграм Саюзнай дзяржавы ў галіне даследавання і выкарыстання касмічнай прасторы з мірнай мэтай». Адзначыў, што сёння высока ацэньваюцца вынікі шматгадовай плённай сумеснай дзейнасці беларускіх і расійскіх спецыялістаў па рэалізацыі навукова-тэхнічных праграм Саюзнай дзяржавы. За шматгадовы перыяд супрацоўніцтва склалася ўстойлівая беларуска-расійская навукова-тэхнічная і вытворчая кааперацыя ў касмічнай сферы.

Удзельнікі дыскусіі абмеркавалі дасягнутыя вынікі, а таксама перспектывы і наяўныя праблемы на гэтым этапе саюзнага будаўніцтва. Мадэратарам мерапрыемства выступіў Дзяржаўны сакратар Саюзнай дзяржавы Дзмітрый Мезенцаў.