Дэлегацыя Нацыянальнай акадэміі навук Беларусі на чале з першым намеснікам Старшыні Прэзідыума НАН Беларусі акадэмікам С. А. Чыжыкам прыняла ўдзел у трэцім пасяджэнні Генеральнай асамблеі Асацыяцыі міжнародных навуковых арганізацый (ANSO), якое праходзіла 4–5 лістапада 2023 года ў г. Чунцын (КНР). НАН Беларусі з’яўляецца членам ANSO з моманту яе заснавання (2018 г.). У цяперашні час членамі ANSO з’яўляюцца 78 арганізацый з 55 дзяржаў. 4 лістапада адобрана ўступленне ў ANSO новых членаў, падтрымана ўнясенне змяненняў у Статут ANSO з мэтай далейшага ўдасканалення работы Асацыяцыі, а таксама прайшлі выбары новага прэзідэнта ANSO, двух віцэ-прэзідэнтаў і 6 новых членаў Кіраўнічага савета. Папярэдні кіраўнік ANSO, экс-прэзідэнт Кітайскай акадэміі навук Бай Чуньлі завяршыў паўнамоцтвы ў сувязі са сканчэннем двух тэрмінаў кіраўніцтва Асацыяцыяй (максімальны перыяд па Статуце ANSO). Новым прэзідэнтам ANSO абраны кіраўнік Нацыянальнага агенцтва навукова-тэхналагічнага развіцця Тайланда (NSTDA) Сукіт Лімпіджумнонг. 5 лістапада адбыліся выступленні кіраўнікоў шэрагу дэлегацый, у час якіх кіраўнік дэлегацыі НАН Беларусі акадэмік С. А. Чыжык прадставіў асноўныя напрамкі і вынікі дзейнасці НАН Беларусі ў перадавых галінах навукі і тэхналогій, а таксама сферы, у якіх НАН Беларусі і членам ANSO мэтазгодна аб’яднаць намаганні для прасоўвання навуковых вынікаў у эканоміку дзяржаў членаў ANSO.
6–7 лістапада дэлегацыя НАН Беларусі на чале з першым намеснікам Старшыні Прэзідыума акадэмікам С. А. Чыжыкам прыняла ўдзел у першай канферэнцыі па навукова-тэхнічных абменах «Пояс і шлях» (г. Чунцын, КНР), арганізаванай урадам КНР. Старшынства на канферэнцыі выконваў міністр навукі і тэхналогій КНР Інь Хэцзюнь. На цырымоніі адкрыцця канферэнцыі быў абвешчаны Зварот Старшыні КНР Сі Цзіньпіна навуковай супольнасці, які прадставіў першы віцэ-прэм’ер КНР Дын Сюэсян. Было адзначана, што наступны этап развіцця ініцыятывы «Адзін пояс, адзін шлях» будзе грунтавацца на навуцы і навукова-тэхналагічным абмене. На круглым стале канферэнцыі ў якасці аднаго з пяці спікераў (адзінага ад дзяржаў СНД) С. А. Чыжыкам былі прадстаўлены асноўныя дасягненні НАН Беларусі і перспектыўныя напрамкі супрацоўніцтва Акадэміі з кітайскімі партнёрамі.
8–9 лістапада дэлегацыя НАН Беларусі на чале з першым намеснікам Старшыні Прэзідыума НАН Беларусі акадэмікам С. А. Чыжыкам наведала Акадэмію навук правінцыі Шаньдун (АНШ) у г. Цзінань. Адбылася сустрэча з Прэзідэнтам АНШ Ван Інлунам і кіраўнікамі аддзяленняў Акадэміі. На перамовах бакі абмеркавалі сферы і механізмы для далейшага супрацоўніцтва і ход рэалізацыі падпісанай у верасні 2023 г. Старшынёй Прэзідыума НАН Беларусі У. Р. Гусаковым і прэзідэнтам АНШ Ван Інлунам Праграмы супрацоўніцтва паміж дзвюма акадэміямі на 2024–2025 гады. Дэлегацыя наведала Шаньдунскі цэнтр аналізу і тэсціравання, якія ўваходзяць у склад АНШ, і нядаўна адкрыты Суперкамп’ютарны цэнтр, дзе прапрацавала магчымыя сферы ўзаемадзеяння з арганізацыямі НАН Беларусі.
