1 снежня 2023 года ў НАН Беларусі адбылася рабочая нарада па фарміраванні Цэнтра паліталогіі.

У мерапрыемстве прынялі ўдзел палітолагі, сацыёлагі, прадстаўнікі вядучых навукова-даследчых і вышэйшых навучальных устаноў краіны: Інстытута сацыялогіі НАН Беларусі, Акадэміі кіравання пры Прэзідэнце Рэспублікі Беларусь, Акадэміі нацыянальнай бяспекі, Беларускага інстытута стратэгічных даследаванняў, БДУ, БДЭУ, Гродзенскага дзяржаўнага ўніверсітэта ім. Янкі Купалы, БДУКМ, СМІ. Былі разгледжаны пытанні фарміравання кадравага складу, структура, мэты і задачы новага Цэнтра, разгледжаны перспектывы яго развіцця.

На рабочай нарадзе было падкрэслена, што стварэнне новай структуры — важны і своечасовы крок, асабліва ў перыяд электаральнай кампаніі, напярэдадні важных палітычных падзей у краіне. Галоўнай мэтай новага Цэнтра стане палітычнае суправаджэнне дзяржаўнага курсу кіраўніцтва краіны. Як адзначыў у ходзе нарады Старшыня Прэзідыума НАН Беларусі Уладзімір Гусакоў: «Новы Цэнтр павінен быць пабудаваны на глыбокай тэарэтычнай базе і настроены на эфектыўную дзейнасць. Яго даследаванні павінны быць нацэлены на вырашэнне актуальных задач, якія стаяць перад грамадствам, сфарміраваны, зыходзячы з патрэб нашай краіны». Уладзімір Гусакоў падкрэсліў, што новы цэнтр будзе працаваць у цеснай сувязі з усімі навуковымі арганізацыямі Аддзялення гуманітарных навук і мастацтваў НАН Беларусі.