26 студзеня 2024 года ў НАН Беларусі адбылася сустрэча Старшыні Прэзідыума Уладзіміра Гусакова з дэлегацыяй навуковых колаў Манголіі на чале з Віцэ-міністрам адукацыі і навукі Ганболдам Ганбаярам. У рамках перамоў, у якіх таксама прымалі ўдзел Надзвычайны і Паўнамоцны Пасол Манголіі ў Рэспубліцы Беларусь Батсух Баярсайхан, прэзідэнт Мангольскай акадэміі навук Дугэр Рэгдэл, начальнік упраўлення па навуцы, тэхналагічнай палітыцы, інавацыйным развіцці і каардынацыі выканаўчай палітыкі Міністэрства адукацыі і навукі Манголіі Даржготаў Батагтох, начальнік упраўлення палітыкі вышэйшай адукацыі Міністэрства адукацыі і навукі Манголіі Хужуу Тамір, дырэктар Фонду навукі і тэхналогій Даржгачоа Одгэрэл, а таксама акадэмікі-сакратары Аддзяленняў навук НАН Беларусі і кіраўнікі ўпраўленняў апарату НАН Беларусі, бакі абмеркавалі бягучае навукова-тэхнічнае супрацоўніцтва паміж Манголіяй і Рэспублікай Беларусь і адзначылі вялікі патэнцыял для ўмацавання беларуска-мангольскага ўзаемадзеяння ў галіне навукі і адукацыі.
Па выніках перамоў дасягнута дамоўленасць аб падпісанні абноўленага Пагаднення з Акадэміяй навук Манголіі з дапаўненнем яго дарожнай картай супрацоўніцтва на 2024–2025 гг., а таксама аб прапрацоўцы пытання падпісання Пагаднення аб супрацоўніцтве паміж НАН Беларусі і Міністэрствам адукацыі і навукі. Таксама бакі разгледзяць магчымасць арганізацыі Форуму маладых вучоных у першай палове 2024 г. і прапрацуюць пытанне навучання мангольскіх спецыялістаў у магістратуры, аспірантуры і дактарантуры ДУА «Універсітэт НАН Беларусі».
Па заканчэнні сустрэчы Віцэ-міністр адукацыі і навукі Манголіі Ганболд Ганбаяр падзякаваў беларускаму боку за прадукцыйныя перамовы і наведванне пастаянна дзеючай выставы распрацовак НАН Беларусі, па выніках агляду якой дэлегацыя ўбачыла, наколькі цесна ўцягнутыя арганізацыі НАН Беларусі ў работу рэальнага сектара эканомікі Рэспублікі Беларусь. Таксама Віцэ-міністр папрасіў старшыню Прэзідыума Уладзіміра Гусакова знайсці магчымасць наведаць Манголію і выступіць перад навуковай грамадскасцю з дакладам аб беларускай мадэлі арганізацыі навукі і механізмах укаранення навуковых распрацовак у эканоміку краіны.
