20 жніўня 2024 года ў Нацыянальным Прэс-цэнтры Рэспублікі Беларусь адбылася прэс-канферэнцыя «Чырвоная кніга — эфектыўны механізм аховы рэдкіх і знікаючых відаў. Праца над 5-м выданнем» У мерапрыемстве прынялі ўдзел: Гештаўт Павел Антонавіч — намеснік генеральнага дырэктара па навуковай і інавацыйнай рабоце ДНВА «НПЦ НАН Беларусі па біярэсурсах»; Кулак Анатоль Віктаравіч — вядучы навуковы супрацоўнік лабараторыі наземных беспазваночных жывёл ДНВА «НПЦ НАН Беларусі па біярэсурсах»; Багдановіч Іван Аляксандравіч — навуковы супрацоўнік лабараторыі арніталогіі ДНВА «НПЦ НАН Беларусі па біярэсурсах» і Саўчук Сяргей Сяргеевіч — загадчык лабараторыі флоры і сістэмы раслін «Інстытута эксперыментальнай батанікі НАН Беларусі».
Навукоўцы расказалі, як у Беларусі рэалізуецца палітыка па ахове рэдкіх відаў, як ідзе праца па стварэнні 5-га выдання Чырвонай кнігі. Пра тое, якія птушкі, рыбы і насякомыя могуць увайсці ў новае выданне Чырвонай кнігі, паведаміў на прэс-канферэнцыі намеснік генеральнага дырэктара па навуковай і інавацыйнай рабоце навукова-практычнага цэнтра НАН Беларусі па біярэсурсах Павел Гештаўт. Так, для класа «Птушкі» з Чырвонай кнігі прапануецца выключыць адзін від і ўключыць тры, а таксама змяніць ахоўны статус для пяці відаў. «На вялікі жаль, прапануецца выключыць аўдотку як від, які ўжо не жыве на тэрыторыі Беларусі. Некалькі дзясяткаў гадоў гэты від фіксаваўся на тэрыторыі Хойніцкага і Брагінскага раёнаў», — адзначыў Павел Гештаўт. Паводле яго слоў, таксама прапануецца ўключыць у Чырвоную кнігу заходнееўрапейскі падвід глушца з прысваеннем II катэгорыі аховы. «Гэта вельмі рэдкі, які мае лакальнае распаўсюджанне падвід, распаўсюджаны ў Літве, Польшчы і Заходняй Беларусі. Для захавання гэтай птушкі ў Беларусі з 2022 года рэалізуецца праграма па развядзенні ў няволі і рассяленні гэтага віду ў былыя месцы пражывання», — сказаў намеснік гендырэктара па навуковай і інавацыйнай рабоце.
Частку неабарыгенных відаў раслін таксама прапануецца выключыць з будучага 5-га выдання Чырвонай кнігі Беларусі. Пра гэта паведаміў загадчык лабараторыі флоры і сістэмы раслін Інстытута эксперыментальнай батанікі НАН Беларусі Сяргей Саўчук. У сваю чаргу, намеснік генеральнага дырэктара па навуковай і інавацыйнай рабоце НПЦ НАН Беларусі па біярэсурсах Павел Гештаўт праінфармаваў прадстаўнікоў СМІ, што ў будучым 5-м выданні Чырвонай кнігі Рэспублікі Беларусь ахоўны статус зубра, бурага мядзведзя, рысі і барсука плануецца панізіць з прычыны павелічэння іх папуляцый.
На заканчэнне навукоўцы адказалі на шматлікія пытанні журналістаў.
