НАН Беларусі і Пакістан плануюць развіваць супрацоўніцтва ў прыярытэтных для краін напрамках. Такая дамоўленасць дасягнута 19 жніўня ў час перамоў першага намесніка Старшыні Прэзідыума НАН Беларусі Сяргея Чыжыка з Прэзідэнтам Акадэміі навук Пакістана Каўзерам Абдулой Малікам.
Як адзначыў у час сустрэчы Сяргей Чыжык, НАН Беларусі і Пакістан звязваюць даўнія навуковыя сувязі, якія падтрымліваліся ў розных варыянтах. У маі 2015 года было падпісана Пагадненне аб навукова-тэхнічным супрацоўніцтве паміж НАН Беларусі і Акадэміяй навук Пакістана. «Надышоў час абнавіць наша пагадненне, уключыўшы туды найбольш актуальныя і прыярытэтныя для абедзвюх краін напрамкі. І мы павінны актывізаваць наша супрацоўніцтва», — падкрэсліў Сяргей Чыжык.
Прэзідэнт Акадэміі навук Пакістана Каўзер Абдула Малік адзначыў, што Пакістан зацікаўлены ў развіцці ўзаемадзеяння з вучонымі Беларусі па такіх напрамках, як штучны інтэлект, лазерныя тэхналогіі і тэхналогіі для сельскай гаспадаркі. Мэта — ужо ў найбліжэйшай будучыні прадэманстраваць канкрэтныя вынікі сумеснай дзейнасці вучоных Беларусі і Пакістана.
19 жніўня 2024 года адбыліся перамовы кіраўніцтва НАН Беларусі з дэлегацыяй Акадэміі навук Пакістана на чале з Прэзідэнтам Акадэміі навук Пакістана Каўзерам Абдулой Малікам. Былі абмеркаваны перспектыўныя напрамкі супрацоўніцтва ў розных навуковых мерапрыемствах на тэрыторыі Рэспублікі Беларусь і Ісламскай Рэспубліцы Пакістан. Госці падрабязна азнаёміліся з апошнімі распрацоўкамі навукоўцаў, якія прадстаўлены на пастаянна дзеючай выставе «Дасягненні айчыннай навукі — вытворчасці».
18–22 жніўня 2024 года праходзіць візіт у НАН Беларусі дэлегацыі Акадэміі навук Пакістана на чале з Прэзідэнтам Акадэміі навук Пакістана Каўзерам Абдулой Малікам. У праграме візіту — наведванне і знаёмства з дзейнасцю шэрагу арганізацый НАН Беларусі: ААТ «НВА Цэнтр»; ДНУ «Інстытут біяарганічнай хіміі НАН Беларусі»; РУП «Навукова-вытворчы цэнтр шматфункцыянальных беспілотных комплексаў НАН Беларусі»; ДНУ «Фізіка-тэхнічны інстытут НАН Беларусі»; ДНУ «Інстытут біяфізікі і клетачнай інжынерыі НАН Беларусі»; ДНУ «Інстытут эксперыментальнай батанікі імя В. Ф. Купрэвіча НАН Беларусі»; ДНУ «Інстытут генетыкі і цыталогіі НАН Беларусі».
