Рашэннем Бюро Прэзідыума НАН Беларусі 26 снежня 2024 года зацверджаны спіс лаўрэатаў штогадовага конкурсу «100 маладых талентаў Нацыянальнай акадэміі навук Беларусі» за 2024 год.

Лаўрэатамі сталі:

Яўген Астрашаб, старшы навуковы супрацоўнік Цэнтра структурных даследаванняў і трыбамеханічных выпрабаванняў матэрыялаў і вырабаў машынабудавання навукова-тэхнічнага цэнтра «Тэхналогіі машынабудавання і тэхналагічнае абсталяванне» ДНУ «Аб’яднаны інстытут машынабудавання НАН Беларусі», кандыдат тэхнічных навук;

Наталля Балюк, навуковы супрацоўнік лабараторыі росту і развіцця раслін ДНУ «Інстытут эксперыментальнай батанікі імя В. Ф. Купрэвіча НАН Беларусі», кандыдат біялагічных навук;

Максім Кучвальскі, памочнік старшыні Прэзідыума Нацыянальнай акадэміі навук Беларусі, кандыдат біялагічных навук;

Мікалай Пракапеня, старшы навуковы супрацоўнік цэнтра «Квантавая оптыка і квантавая інфарматыка» ДНУ «Інстытут фізікі імя Б. І. Сцяпанава НАН Беларусі», кандыдат фізіка-матэматычных навук, дацэнт;

Вераніка Шчур, старшы навуковы супрацоўнік лабараторыі бялковай інжынерыі ДНУ «Інстытут біяарганічнай хіміі НАН Беларусі», кандыдат хімічных навук.

Штогадовы конкурс «100 маладых талентаў Нацыянальнай акадэміі навук Беларусі» заснаваны ў 2018 годзе. Агульная колькасць маладых навукоўцаў, якія адначасова ўваходзяць у банк даных «100 маладых талентаў Нацыянальнай акадэміі навук Беларусі», не можа перавышаць 100 чалавек, а штогадовая колькасць лаўрэатаў конкурсу — не больш за 20 чалавек. Знаходжанне ў банку даных кандыдатаў навук — да дасягнення імі 35-гадовага ўзросту, дактароў навук — да 45 гадоў. Да ўдзелу ў конкурсе дапускаюцца кандыдаты навук ва ўзросце да 30 гадоў і дактары навук ва ўзросце да 40 гадоў, якія працуюць у арганізацыях НАН Беларусі.

Лаўрэаты конкурсу ўключаюцца ў банк даных «100 маладых талентаў Нацыянальнай акадэміі навук Беларусі» (з выдачай адпаведнага сертыфіката) і ў рэзерв кіраўнічых кадраў НАН Беларусі, атрымліваюць штогадовы грант на ўдзел у міжнародным навуковым, навукова-арганізацыйным або навукова-практычным мерапрыемстве (канферэнцыі, сімпозіумы, навуковыя школы, кароткатэрміновыя стажыроўкі і інш.) і штогадовую прэмію ў памеры да 7 базавых ставак у перыяд уваходжання ў банк даных.

Мэта конкурсу «100 маладых талентаў Нацыянальнай акадэміі навук Беларусі» — рэалізацыя мер па прыцягненні і замацаванні таленавітай моладзі ў навуковай, навукова-тэхнічнай і інавацыйнай сферах; стварэнне маладзёжных навукова-даследчых груп і амаладжэнне кадравага складу навуковых арганізацый; забеспячэнне пераемнасці паміж вучонымі розных пакаленняў.