Пагадненне аб супрацоўніцтве падпісалі НАН Беларусі і Санкт-Пецярбургскае аддзяленне РАН
22 красавіка 2025 года ў НАН Беларусі адбылося падпісанне Пагаднення аб навукова-тэхнічным супрацоўніцтве паміж Нацыянальнай акадэміяй навук Беларусі і Санкт-Пецярбургскім аддзяленнем Расійскай акадэміі навук. Дакумент падпісалі першы намеснік Старшыні Прэзідыума НАН Беларусі Сяргей Чыжык і старшыня Санкт-Пецярбургскага аддзялення РАН Андрэй Рудскі.
Пагадненне аб навукова-тэхнічным супрацоўніцтве паміж НАН Беларусі і СПбА РАН накіравана на пашырэнне сумесных фундаментальных і прыкладных навуковых даследаванняў і распрацовак па важнейшых напрамках развіцця навукі і тэхнікі, а таксама стварэнне ўмоў для развіцця навуковых школ, падрыхтоўкі навуковых работнікаў вышэйшай кваліфікацыі, павышэння кваліфікацыі вучоных і спецыялістаў НАН Беларусі і СПбА РАН, а таксама рэалізацыю сумесных праектаў. Партнёрства вучоных НАН Беларусі і Санкт-Пецярбургскага аддзялення РАН прадугледжвае каардынацыю дзеянняў і аб'яднанне намаганняў у галіне навуковай, навукова-тэхнічнай і адукацыйнай дзейнасці. Бакі дамовіліся аб развіцці розных форм супрацоўніцтва. Сярод іх: камерцыялізацыя вынікаў сумеснай даследчай дзейнасці; арганізацыя ўзаемавыгадных міжнародных кантактаў у галіне навукі і тэхнікі; сумесны ўдзел у заяўках на атрыманне нацыянальных і міжнародных грантаў; арганізацыя праграм па навучанні і падрыхтоўцы кадраў вышэйшай навуковай кваліфікацыі; правядзенне сумесных міжнародных канферэнцый, сімпозіумаў і семінараў у мэтах папулярызацыі дасягненняў навукоўцаў Беларусі і Расіі і інш.
22 красавіка 2025 года адбыліся перамовы кіраўніцтва НАН Беларусі з дэлегацыяй Санкт-Пецярбургскага аддзялення Расійскай акадэміі навук на чале з рэктарам Санкт-Пецярбургскага політэхнічнага ўніверсітэта Пятра Вялікага, Старшынёй Санкт-Пецярбургскага аддзялення РАН Андрэем Рудскім, віцэ-прэзідэнтам РАН. У ходзе перамоў былі абмеркаваны перспектыўныя напрамкі і механізмы сумеснай навукова-тэхнічнай дзейнасці. Дасягнута дамоўленасць, што ў бліжэйшы час будзе распрацавана Дарожная карта па рэалізацыі Пагаднення і пашырэння супрацоўніцтва вучоных. Сярод напрамкаў, якія ўяўляюць узаемную цікавасць: фізіка і інжынерныя навукі, біялогія, медыцына для жыцця, фармакалогія, даследаванні ў Антарктыдзе і г. д.
21 – 24 красавіка 2025 года праходзіць візіт у НАН Беларусі дэлегацыі Санкт-Пецярбургскага аддзялення Расійскай акадэміі навук. Госці падрабязна азнаёміліся з апошнімі распрацоўкамі навукоўцаў, якія прадстаўлены на пастаянна дзеючай выставе «Дасягненні айчыннай навукі – вытворчасці». У праграме візіту – наведванне шэрагу навуковых арганізацый: ДНУ «Інстытут фізікі імя Б. I. Сцяпанава НАН Беларусі», ДНУ «Інстытут прыкладной фізікі НАН Беларусі», ДНУ «Інстытут парашковай металургіі імя акадэміка А. У. Романа».
