У Нацыянальнай акадэміі навук Беларусі сёння адбылася нарада з удзелам Дзяржаўнага сакратара Саюзнай дзяржавы Сяргея Глазьева і Старшыні Прэзідыума НАН Беларусі Уладзіміра Караніка, на якой былі разгледжаны дванаццаць праграм Саюзнай дзяржавы ў сферах абароны, бяспекі, ваенна-тэхнічнага супрацоўніцтва, сацыяльнай палітыкі і эканомікі. Шэсць з іх з'яўляюцца перспектыўнымі, у тым ліку чатыры – па лініі Нацыянальнай акадэміі навук Беларусі. Гэта «Тэхналагічная платформа ідэнтыфікацыі новых малекулярных мішэняў: мембранных бялкоў і іх комплексаў» («Саюз-Біямембраны»), «Распрацоўка рабатызаваных тэхнічных сродкаў для прамысловага садоўніцтва» («Садоўніцтва-СД»), «Iнавацыйныя тэхналогіі і абсталяванне для вытворчасці прадуктаў спецыялізаванага дзіцячага харчавання» («Дзіцячае харчаванне») і «Распрацоўка комплексу аўтаматызаваных і рабатызаваных машын, абсталявання і лічбавых тэхналогій для малочнай жывёлагадоўлі» («Інтэлектуальная ферма-СД»).
Як паведаміў Дзяржаўны сакратар Саюзнай дзяржавы Сяргей Глазьеў, у цяперашні час у Саюзнай дзяржаве рэалізуецца тры праграмы ў высокатэхналагічных сферах, звязаных з электроннымі кампанентамі ў аўтамабілебудаванні, якія закліканы падняць канкурэнтаздольнасць і тэхнічныя магчымасці нашых аўтамабіляў. Яшчэ адна – у галіне фатонікі. Яна накіравана на паляпшэнне якасці прыбораў, уключаючы выкарыстоўваемыя ў касмічных даследаваннях.
Сяргей Юр'евіч высока ацаніў ролю Нацыянальнай акадэміі навук Беларусі ў рэалізацыі навуковых праграм Саюзнай дзяржавы. «НАН Беларусі з'яўляецца галаўной навуковай арганізацыяй у Саюзнай дзяржаве ў пытаннях рэалізацыі навукова-тэхнічных праграм. Мы заўсёды спадзяёмся на экспертнае меркаванне Акадэміі», – падкрэсліў ён. Дзяржсакратар таксама распавёў аб стварэнні наднацыянальнага камітэта па стандартызацыі ў Саюзнай дзяржаве. Паводле яго слоў, хутка адбудзецца агульная калегія Дзяржстандарту Беларусі і Расстандарту, якія адказваюць за стандартызацыю. Яны разам распрацоўваюць стандарты, у тым ліку для СНД. «Перадавы тэхнічны ўзровень дзвюх арганізацый дазваляе нам разлічваць на тое, што камітэт стане лідарам інтэлектуальным і навукова-тэхнічным у галіне стандартызацыі», – сказаў Сяргей Глазьеў.
У сваю чаргу Старшыня Прэзідыума НАН Беларусі Уладзімір Каранік паведаміў, што ў мікраэлектроніцы і даследаванні касмічнай прасторы ўжо ёсць канкрэтныя вынікі і вырабы, якія павысяць узровень тэхналагічнага суверэнітэту дзвюх краін. Канкрэтныя мерапрыемствы па даследаваннях у сферы біятэхналогій стартуюць літаральна на днях. «Да гэтай нарады мы падышлі з добрымі вынікамі. Зараз дзейнічаюць тры саюзныя праграмы па фатоніцы і мікраэлектроніцы, даследаваннях касмічнай прасторы і біятэхналогіях. Яны налічваюць больш за дваццаць мерапрыемстваў і прысвечаны найбольш актуальным пытанням навуковай і навукова-тэхнічнай дзейнасці», – сказаў кіраўнік Акадэміі.
У рабоце нарады ўдзельнічалі прадстаўнікі з 12 міністэрстваў і ведамстваў Беларусі, а таксама 11 арганізацый НАН Беларусі. Усяго – больш за 70 чалавек.
