Уладзімір Каранік: у беларускай жанчыне адлюстроўваецца не толькі вечная прыгажосць, але і лепшыя якасці нашага народа
У беларускай жанчыне адлюстроўваецца не толькі вечная прыгажосць, але і лепшыя якасці нашага народа: стойкасць, смеласць, духоўнасць, дабрыня, крэатыўнасць. Пра гэта паведаміў сёння на адкрыцці навукова-практычнай канферэнцыі «Уклад жанчыны ў гісторыю Мінска» Старшыня Прэзідыума НАН Беларусі Уладзімір Каранік.
Кіраўнік Акадэміі навук падкрэсліў, што сёння ў Беларусі няма прафесій, недаступных жанчынам, – прадстаўніцы прыгожай паловы чалавецтва прадстаўлены ва ўсіх сферах нашага жыцця і ўносяць значны ўклад у развіццё грамадства і дзяржавы, забяспечваючы суверэнітэт і нацыянальную бяспеку краіны.
«Выклікае захапленне, што ўсе гэтыя складаныя прафесіі жанчыны асвойваюць, рэалізоўваючы сябе ў мацярынстве і выступаючы традыцыйнымі захавальнікамі хатняга ачага і сямейных каштоўнасцяў, радуюць нас сваёй прыгажосцю і абаяннем. Упэўнены, што сённяшні прадстаўнічы форум значна пашырыць існуючыя веды і адкрые новыя факты аб ролі жанчын у гісторыі нашага горада, нашай краіны», – сказаў Уладзімір Каранік.
Для ўдзельнікаў і гасцей мерапрыемства ў фае арганізаваны выставы «Мінск археалагічны» і «Мінск і мінчанкі».
