У Нацыянальнай акадэміі навук Беларусі прайшоў Беларуска-Кітайскі навукова-практычны семінар па тэме «Сучасныя біятэхналогіі: актуальныя напрамкі і перспектывы развіцця», у якім удзельнічалі вядучыя навукоўцы і спецыялісты ў галіне біятэхналогій з НАН і Кітайскай акадэміі навук.
У рамках семінара абмяркоўваліся перспектыўныя напрамкі развіцця біятэхналагічнай галіны. Адбыўся таксама абмен вопытам і напрацоўкамі, якія ахопліваюць шырокі спектр тэм, пачынаючы ад фундаментальных даследаванняў і заканчваючы прыкладнымі распрацоўкамі.
З прывітальным словам да гасцей і ўдзельнікаў мерапрыемства звярнуўся намеснік Старшыні Прэзідыума НАН Беларусі Аляксей Труханаў. Ён падкрэсліў, што ўзаемадзеянне паміж Акадэміяй навук і КАН выйшла на якасна новы ўзровень. У 2025 годзе падпісаны два дагаворныя дакументы: пагадненне аб навукова-тэхнічным супрацоўніцтве паміж НАН і КАН і план мерапрыемстваў па актывізацыі супрацоўніцтва на 2025-2030 гады.
«Час ставіць перад намі новыя выклікі, і нам нельга спыняцца на дасягнутых выніках. Я бачу перспектывы нашага супрацоўніцтва ў паглыбленні кааперацыі ў такіх галінах, як біятэхналогіі і медыцына, оптыка і фотаэлектроніка, матэрыялазнаўства, інфармацыйныя тэхналогіі і штучны інтэлект, касмічныя даследаванні і іншыя», – сказаў Аляксей Труханаў.
Праграмай візіту дэлегацыі Кітайскай акадэміі навук на чале з віцэ-прэзідэнтам Кітайскай акадэміі навук Хэ Хунпін запланавана правядзенне шэрагу мерапрыемстваў і сустрэч, у тым ліку са Старшынёй Прэзідыума НАН Беларусі Уладзімірам Каранікам. Галоўнай тэмай іх абмеркавання сталі перспектывы далейшага развіцця супрацоўніцтва паміж акадэмічнымі арганізацыямі дзвюх краін.
Асаблівая ўвага была ўдзелена рэалізацыі беларуска-кітайскіх навуковых і навукова-тэхнічных праектаў і правядзенню сумесных даследаванняў у розных галінах навуковай дзейнасці.
«Наша супрацоўніцтва з'яўляецца лагічным працягам міждзяржаўных кантактаў на вышэйшым узроўні і глыбокай асабістай дружбы паміж лідарамі Беларусі і Кітая. Перакананы, што, аб'яднаўшы наш інтэлектуальны і вытворчы патэнцыял, мы зможам рэалізаваць амбіцыйныя і прарыўныя праекты, якія забяспечаць тэхналагічны суверэнітэт і прынясуць значную карысць эканомікам нашых краін», – сказаў Уладзімір Каранік.
Кіраўнік Акадэміі навук падкрэсліў гатоўнасць беларускіх вучоных да актыўнага ўзаемадзеяння ў сферах, якія ўяўляюць узаемную цікавасць, такіх як новыя матэрыялы, мікраэлектроніка, біятэхналогіі, інфармацыйныя тэхналогіі і касмічныя даследаванні.
У рамках сустрэчы абмяркоўваліся таксама магчымасці пашырэння акадэмічнай мабільнасці, уключаючы стажыроўкі маладых навукоўцаў і правядзенне сумесных канферэнцый і семінараў.
