Дэлегацыя НАН Беларусі ўдзельнічае ў Еўразійскім эканамічным форуме ў Астане
Дэлегацыя НАН Беларусі на чале з галоўным вучоным сакратаром Васілём Гурскім удзельнічае ў Еўразійскім эканамічным форуме, які сёлета праходзіць пад старшынствам Казахстана ў Астане.
На палях форуму адбылася сустрэча Васіля Гурскага з віцэ-прэзідэнтам Акадэміі навук Рэспублікі Казахстан Аленай Шаўчэнка. Бакі абмеркавалі шырокі спектр пытанняў, якія датычацца ўмацавання двухбаковага навукова-тэхнічнага супрацоўніцтва паміж дзвюма акадэміямі. Асаблівая ўвага была ўдзелена пошуку эфектыўных механізмаў для рэалізацыі сумесных навуковых і даследчых праектаў.
Васіль Гурскі падкрэсліў важнасць развіцця міжакадэмічнага дыялогу і адзначыў ключавыя напрамкі двухбаковага навукова-тэхнічнага супрацоўніцтва, у якіх беларускія і казахстанскія навукоўцы бачаць найбольшы патэнцыял. Акрамя таго, бакі дамовіліся аб правядзенні сумесных навуковых канферэнцый і семінараў, накіраваных на папулярызацыю навуковых дасягненняў і прыцягненне моладзі ў навуковую дзейнасць.
V Еўразійскі эканамічны форум праходзіць 28-29 мая ў Астане (Рэспубліка Казахстан). Форум прымеркаваны да пасяджэння Вышэйшага Еўразійскага эканамічнага савета з удзелам кіраўнікоў дзяржаў Еўразійскага эканамічнага саюза.
