НАН Беларусі і ўніверсітэт Дунхуа з Шанхая падпісалі мемарандум аб супрацоўніцтве
Нацыянальная акадэмія навук Беларусі і ўніверсітэт Дунхуа (Шанхай, Кітай) падпісалі мемарандум аб супрацоўніцтве і партнёрстве. Подпісы пад дакументам паставілі намеснік Старшыні Прэзідыума НАН Беларусі Аляксей Труханаў і дырэктар аддзела супрацоўніцтва ўніверсітэта Лю Янань.
Згодна з дакументам узаемадзеянне будзе ажыццяўляцца шляхам рэалізацыі сумесных навукова-тэхнічных праектаў у галіне матэрыялазнаўства, хіміі новых матэрыялаў, ІКТ і біятэхналогій.
«Гэта пагадненне адкрывае шырокія перспектывы для сумеснай работы і ўмацавання навуковых сувязяў паміж Беларуссю і Кітаем. Рэалізацыя сумесных праектаў дасць магчымасць не толькі павысіць якасць даследаванняў, але і стварыць умовы для падрыхтоўкі высокакваліфікаваных спецыялістаў, здольных эфектыўна працаваць на стыку розных навуковых дысцыплін», – сказаў Аляксей Труханаў.
Акрамя сумесных даследаванняў, мемарандум прадугледжвае рэгулярны абмен інфармацыяй, удзел прадстаўнікоў Беларусі і Кітая ў міжнародных канферэнцыях, а таксама навучанне спецыялістаў з абедзвюх краін.
