У кітайскім Сіань адбудзецца 39-е пасяджэнне Савета МААН
У кітайскім горадзе Сіань (правінцыя Шэньсі) 28 кастрычніка 2026 года адбудзецца 39-е пасяджэнне Савета Міжнароднай асацыяцыі акадэмій навук (МААН). Арганізатарам мерапрыемства выступае Нацыянальная акадэмія навук Беларусі сумесна з Паўночна-Заходнім політэхнічным універсітэтам (ПЗПУ).
Пасяджэнне Савета МААН пройдзе на палях маштабнай канферэнцыі выбітных навукоўцаў Глабальнага Поўдня, што падкрэслівае імкненне бакоў да ўмацавання і паглыблення навукова-тэхналагічнага супрацоўніцтва паміж краінамі.
Дарэчы, выбар Сіаня ў якасці пляцоўкі для правядзення Савета МААН не выпадковы. Нагадаем, што 22 жніўня 2024 года ў Мінску было падпісана знакавае пагадненне аб стварэнні прадстаўніцтва НАН Беларусі на базе Паўночна-Заходняга політэхнічнага ўніверсітэта.
У ходзе 39-га пасяджэння Савета МААН прадстаўнікі вядучых навуковых арганізацый краін-удзельніц абмяркуюць актуальныя пытанні навукова-тэхнічнага і інавацыйнага супрацоўніцтва, інтэграцыі акадэмічнай навукі і бізнесу, падрыхтоўкі кадраў. Важнай часткай праграмы стане пасяджэнне Савета маладых навукоўцаў МААН, закліканае стаць новым імпульсам для развіцця міжнароднага маладзёжнага навуковага дыялогу.
Міжнародная асацыяцыя акадэмій навук (МААН) была створана ў 1993 годзе для вырашэння найбольш важных праблем навуковага развіцця, вызначэння напрамкаў фундаментальных і прыкладных даследаванняў, узгаднення навуковай стратэгіі акадэмій навук і буйных навуковых цэнтраў розных краін. На пасяджэнні Савета МААН у верасні 2025 года ў Мінску кіраўніком Асацыяцыі абраны старшыня Прэзідыума Нацыянальнай акадэміі навук Беларусі Уладзімір Каранік.
