Маладыя навукоўцы НАН Беларусі з 19 па 26 жніўня ўдзельнічаюць у Летняй школе на базе Інстытута прыкладной хіміі Кітайскай акадэміі навук у горадзе Чанчунь
У склад беларускай дэлегацыі ўвайшлі 20 перспектыўных даследчыкаў, якія прадстаўляюць навуковыя арганізацыі Акадэміі навук: Навукова-практычны цэнтр па матэрыялазнаўстве, Інстытут агульнай і неарганічнай хіміі, Інстытут фізікі імя Б.I. Сцяпанава, Інстытут цепла- і масаабмену імя А.В. Лыкава, Фізіка-тэхнічны інстытут і Інстытут парашковай металургіі.
Удзел у мерапрыемстве стане важным крокам ва ўмацаванні навукова-тэхнічнага супрацоўніцтва паміж Беларуссю і Кітаем у рамках ініцыятывы «Пояс і шлях».
Праграма Летняй школы ўключае інтэнсіўны курс лекцый ад вядучых кітайскіх экспертаў па ключавых напрамках сучаснай навукі.
Акрамя тэарэтычнага блока, праграма ўключае таксама інтэнсіўныя трэнінгі. Маладыя навукоўцы і даследчыкі пазнаёмяцца з інавацыйнымі падыходамі ў стварэнні матэрыялаў для энергетыкі, уключаючы электрахімічныя назапашвальнікі і пераўтваральнікі энергіі.
Візіт у Інстытут прыкладной хіміі Кітайскай акадэміі навук дазволіць беларускім спецыялістам не толькі вывучыць перадавыя метады работы, але і наладзіць прамыя прафесійныя кантакты з кітайскімі калегамі, у тым ліку для выканання новых сумесных навукова-даследчых праектаў.
