У Акадэміі навук адбылася сустрэча рэктараў вышэйшых навучальных устаноў
У Нацыянальнай акадэміі навук Беларусі прайшла знакавая сустрэча рэктараў вышэйшых навучальных устаноў краіны. Ключавой тэмай абмеркавання сталі пытанні камерцыялізацыі навуковых распрацовак, трансферу ўніверсітэцкіх тэхналогій у рэальны сектар эканомікі і ўмацавання сувязяў паміж вузаўскай і акадэмічнай навукай.
У мерапрыемстве прыняў удзел Старшыня Прэзідыума НАН Беларусі Уладзімір Каранік. У сваім выступленні ён зрабіў акцэнт на важнасці «бясшвовай» сістэмы падрыхтоўкі кадраў. Паводле яго слоў, універсітэт – гэта стартавая пляцоўка, дзе фарміруецца будучы даследчык. Пераемнасць паміж універсітэтам і акадэмічнай лабараторыяй дазваляе рухаць тэхналогіі наперад і развівацца.
Адной з цэнтральных тэм дыскусіі стаў пошук балансу паміж фундаментальнымі даследаваннямі і прыкладнымі вынікамі. Кіраўнік НАН перасцярог: калі патрабаваць ад навукі і навукоўцаў выключна хуткай камерцыялізацыі, ёсць рызыка страціць фундаментальную навуку. Перайсці ў чыстую тэорыю і займацца пытаннямі, адарванымі ад рэальнага жыцця і патрэб рэальнага сектара эканомікі, – шлях у нікуды. «Таму пытанняў тут сапраўды шмат, і пытанне гэтае абсалютна няпростае», – падкрэсліў Уладзімір Каранік.
Кіраўнік Акадэміі навук таксама звярнуў увагу, што перад навуковай супольнасцю пастаўлена задача забяспечыць выкананне ўсяго тэхналагічнага ланцужка: ад ідэі і фундаментальных даследаванняў да прыкладных работ і выпуску гатовых вырабаў.
У ходзе школы рэктараў удзельнікі таксама абмеркавалі ўдасканаленне работы саветаў па абароне дысертацый і выпрацоўку новых, больш эфектыўных крытэрыяў ацэнкі навуковай дзейнасці, якія б дазволілі аб'ектыўна вымяраць і ацэньваць рэальны ўклад вучоных у развіццё эканомікі і грамадства.
Падводзячы вынікі дыскусіі, Старшыня Прэзідыума НАН Беларусі Уладзімір Каранік падкрэсліў значнасць універсітэцкага сектара ў фарміраванні навуковага патэнцыялу і інавацыйных ідэй, якія знаходзяць прымяненне ў прамысловасці. «Без вузаўскай навукі не будзе ні акадэмічнай, ні галіновай навукі», – сказаў ён.
