У Нацыянальнай акадэміі навук Беларусі пад кіраўніцтвам намесніка Старшыні Прэзідыума НАН Аляксея Труханава і намесніка старшыні ДКСЭ Арцёма Лапко адбылася рабочая нарада з удзелам прадстаўнікоў навуковай супольнасці і судовых экспертаў
У цэнтры ўвагі – абмеркаванне дасягнутых дамоўленасцей і развіццё стратэгічнага супрацоўніцтва.
Ключавым вынікам сустрэчы стала стварэнне міжведамаснай рабочай групы. У яе склад увайшлі вядучыя навукоўцы НАН і эксперты ДКСЭ, якія зоймуцца каардынацыяй сумесных даследаванняў.
Асноўны фокус увагі – распрацоўка і выпуск імпартазамяшчальнай прадукцыі для патрэб судова-экспертнай дзейнасці, а таксама ўкараненне перадавых высокатэхналагічных методык у работу ведамства.
У ходзе нарады бакі выпрацавалі алгарытм практычнай рэалізацыі намечаных праектаў, які дасць магчымасць істотна павысіць дакладнасць, аператыўнасць і агульную эфектыўнасць даследаванняў, і зробіць значны ўклад у забеспячэнне правапарадку і нацыянальнай бяспекі Беларусі.
«Супрацоўніцтва з Дзяржаўным камітэтам судовых экспертыз носіць стратэгічны характар. Сёння мы дакладна разумеем, якія задачы стаяць перад айчыннай навукай у рамках нашага ўзаемадзеяння. Мы ўжо разгледзелі канкрэтныя тэматыкі даследаванняў і механізмы іх рэалізацыі, што дазволіць максімальна эфектыўна выкарыстоўваць навуковы патэнцыял Акадэміі навук для вырашэння прыкладных задач у інтарэсах правапарадку», – сказаў Аляксей Труханаў, каменціруючы вынікі сустрэчы.
Важным крокам у развіцці кадравага патэнцыялу стала падпісанне пагаднення паміж універсітэтам НАН Беларусі і навукова-практычным цэнтрам ДКСЭ.
Дакумент заклаў прававую і арганізацыйную аснову для доўгатэрміновага партнёрства ў навукова-даследчай і адукацыйнай сферах, а таксама ў пытаннях падрыхтоўкі і павышэння кваліфікацыі кадраў вышэйшай навуковай кваліфікацыі.
