Нацыянальная акадэмія навук Беларусі падпісала два пагадненні аб супрацоўніцтве з Акадэміямі навук Манголіі і правінцыі Хэйлунцзян Кітая
Цырымонія падпісання адбылася ў ходзе 39-га пасяджэння Савета Міжнароднай асацыяцыі акадэмій навук (МААН), якое прайшло ў кітайскім горадзе Сіань.
Дарожная карта на перыяд 2026-2028 гадоў з Акадэміяй навук Манголіі прадугледжвае правядзенне сумесных даследаванняў, абмен вопытам і падрыхтоўку высокакваліфікаваных кадраў у розных галінах навукі.
Дакумент падпісалі Старшыня Прэзідыума НАН Беларусі Уладзімір Каранік і вучоны сакратар Мангольскай акадэміі навук Шажынбат Арыунаа.
Пагадненне аб навукова-тэхнічным супрацоўніцтве заключылі таксама Аддзяленне біялагічных навук НАН Беларусі і Інстытут прыроды і экалогіі Акадэміі навук правінцыі Хэйлунцзян (КНР).
Подпісы пад дакументам паставілі намеснік Старшыні Прэзідыума НАН Беларусі Аляксей Труханаў і дырэктар Інстытута прыроды і экалогіі Акадэміі навук правінцыі Хэйлунцзян Лю Іннань.
Пагадненне адкрывае новыя магчымасці для правядзення сумесных даследаванняў у галіне біялогіі, экалогіі і прыродакарыстання і будзе спрыяць актыўнаму абмену навуковымі дасягненнямі і перадавымі тэхналогіямі паміж беларускімі і кітайскімі навукоўцамі.
