20 чэрвеня 2016 года (панядзелак) у 15.00 у НАН Беларусі (пр. Незалежнасці, 66) адбудзецца адкрыццё пасяджэння Савета Асацыяцыі еўрапейскіх акадэмій навук (ALLEA). Для ўдзелу ў мерапрыемстве, якое пройдзе ў Мінску 21–22 чэрвеня 2016 года, прыбывае дэлегацыя Савета на чале з Прэзідэнтам Асацыяцыі еўрапейскіх акадэмій навук (ALLEA) Гюнтарам Штокам. Сярод членаў Савета – прадстаўнікі акадэмій навук Германіі, Аўстрыі, Вялікабрытаніі, Італіі, Бельгіі, Фінляндыі, Швейцарыі і інш. У ходзе пасяджэння будуць разгледжаны ключавыя пытанні па арганізацыі навуковай дзейнасці ў Еўропе, стварэнне агульнаеўрапейскай даследчай прасторы, а таксама новыя напрамкі супрацоўніцтва НАН Беларусі з навуковымі арганізацыямі Еўропы.

Дамоўленасць аб правядзенні пасяджэння Савета Асацыяцыі еўрапейскіх акадэмій навук (ALLEA) у чэрвені 2016 года ў Мінску была дасягнута ў час сустрэчы дэлегацыі НАН Беларусі з Прэзідэнтам Асацыяцыі еўрапейскіх акадэмій навук (ALLEA) Гюнтарам Штокам у ходзе пасяджэння Генеральнай асамблеі Асацыяцыі еўрапейскіх акадэмій навук (ALLEA) у г. Лісабон 23–24 красавіка 2015 г.

ALLEA – федэрацыя 58 акадэмій навук і мастацтваў з 40 еўрапейскіх краін (у тым ліку Беларусі). На сённяшні дзень яна з’яўляецца самым уплывовым аб’яднаннем навуковых арганізацый на еўрапейскай прасторы. Асацыяцыя ставіць на мэце абмен інфармацыяй і вопытам паміж Акадэміямі навук, садзеянне ўстанаўленню і падтрыманню высокіх стандартаў навуковай дзейнасці і навуковай экспертызы. Асноўныя напрамкі працы ALLEA – гэта арганізацыя мерапрыемстваў для стварэння агульнаеўрапейскай даследчай прасторы, абароны інтэлектуальнай уласнасці, асвятлення праблем і тэндэнцый развіцця навукі ў СМІ, пытанні навуковай этыкі, а таксама кіравання ў навукова-тэхнічным сектары.

Прэзідэнт ALLEA Гюнтар Шток з’яўляецца таксама Прэзідэнтам Саюза германскіх акадэмій навук і Прэзідэнтам Берлін Брандэнбургскай акадэміі навук і мастацтваў.