Адлюстраваць тэхнічнае развіццё свету будучага прапанавалі юным мастакам у Інстытуце філасофіі НАН Беларусі. Вынікі творчага задання можна было ўбачыць на выставе “Навукова-тэхнічны прагрэс вачыма дзіцяці”, прысвечанай Дню беларускай навукі. Працы экспанаваліся ў сценах Інстытута філасофіі НАН Беларусі з 20 студзеня па 08 лютага 2017 года. У экспазіцыі былі прадстаўлены малюнкі дзяцей ад 4 да 13 гадоў, выкананыя ў розных тэхніках: аплікацыя, гуаш, гель, аловак, фламастар.

Хлопцы адлюстравалі “Горад будучыні”, “Фантастычны транспарт”, “Паветраную дарогу” (Савелій Куксачоў, 7 гадоў), “Партал на Марс” (Марына Васкабовіч, 9 гадоў), “Заапарк на іншай планеце” (Ева Натарыус, 13 гадоў) . Арганізатары выставы адзначаюць, што гэтыя малюнкі паказваюць нам, што звыклы свет будзе іншым, больш тэхналагічным і дасканалым. Але, у той жа час, у нашай будучыні захаваюцца і вечныя каштоўнасці, якія злучаюць мінулае з сучаснасцю і будучыняй, якія знайшлі выяўленне ў такіх працах, як “Хатні любімец”, “Зялёны бітон і саспелая груша”, “Першы вясновы дождж” (Марыя Дзермяшкова, 9 гадоў), “Казачны лес” (Мікалай Куіш, 4 гады), “Святочны птушыны дом” (Алена Куіш, 6 гадоў).

Удзельнікі выставы ўзнагароджаны дыпломамі і прызамі.