Інавацыйна-прамысловы кластар будзе каардынуючай структурай, якая ажыццяўляе сваю дзейнасць у сферы навуковых даследаванняў, доследна-канструктарскіх распрацовак, вытворчасці вырабаў мікра-, опта- і ЗВЧ-электронікі, а таксама электроннага і оптыка-электроннага машынабудавання і прыборабудавання. Дзейнасць кластара дазволіць прымаць узгодненыя рашэнні ў адпаведнасці з сусветнай кан’юнктурай на рынку мікраэлектронікі і электроннага машынабудавання.
Як адзначыў генеральны дырэктар ДНВА “Оптыка, оптаэлектроніка і лазерная тэхніка”, дырэктар Інстытута фізікі імя Б.І. Сцяпанава НАН Беларусі, акадэмік Мікалай Казак: “Стварэнне кластара ў сферы электронікі створыць прававую аснову для зладжанай сумеснай работы арганізацый Акадэміі навук, ВНУ, прамысловых прадпрыемстваў. Мы распрацавалі перспектыўны план супрацоўніцтва на 2017-2020 гады. У яго ўваходзіць стварэнне некалькіх цэнтраў”.
Згодна з перспектыўным планам, на базе “Інтэграла” плануецца стварыць тэхналагічны эксперыментальны цэнтр для распрацоўкі новых тэхналогій вытворчасці вырабаў у сферы мікраэлектронікі. Таксама будзе створаны Цэнтр радыяцыйных выпрабаванняў вырабаў мікраэлектронікі на базе НПЦ па матэрыялазнаўстве НАН Беларусі сумесна з ААТ “Інтэграл”. Акрамя таго, плануецца ствараць новае тэхналагічнае абсталяванне ў ААТ “Планар” у Цэнтры развіцця дакладнага электроннага машынабудавання, які будзе арганізаваны сумесна з ААТ “Інтэграл” і Акадэміяй навук.
