Круглы стол “Рэалізацыя ў Рэспубліцы Беларусь актуальных праектаў і грамадскіх ініцыятыў патрыятычнай накіраванасці”, прымеркаваны да Дня абаронцаў Айчыны, прайшоў 21 лютага 2017 года ў Нацыянальным прэс-цэнтры Рэспублікі Беларусь. У мерапрыемстве прынялі ўдзел дэпутаты Палаты прадстаўнікоў Нацыянальнага сходу Рэспублікі Беларусь, супрацоўнікі Інстытута гісторыі НАН Беларусі, Беларускага Таварыства Чырвонага Крыжа, Беларускага фонду міру і іншых арганізацый. Дырэктар Інстытута гісторыі НАН Беларусі Вячаслаў Даніловіч азнаёміў прысутных з праектамі патрыятычнай накіраванасці, якія рэалізуюцца інстытутам. На 2017 год запланавана правядзенне больш за 20 навуковых і навукова-практычных мерапрыемстваў, у якіх мяркуецца падключэнне да ўдзелу ў першую чаргу маладога пакалення.

Таксама В. Даніловіч адзначыў цеснае супрацоўніцтва інстытута ў справе правядзення выхаваўчых мерапрыемстваў з мясцовымі органамі ўлады ў плане сумеснай арганізацыі і правядзення конкурсаў для вучняў і настаўнікаў па гісторыі роднага краю.

Адным з паспяховых шматгадовых навукова-патрыятычных праектаў з’яўляецца міжнародная маладзёжная навукова-практычная канферэнцыя “Вялікая Айчынная вайна 1941-1945 гадоў у гістарычнай памяці народа”. У 2016 годзе канферэнцыя, якая арганізуецца Інстытутам гісторыі НАН Беларусі сумесна з БДПУ імя М.Танка, камітэтам па адукацыі Мінгарвыканкама, іншымі органамі ўлады і гімназіяй № 174 г. Мінска прайшла ўжо ў дзявяты раз.

Акрамя таго В. Даніловіч расказаў аб супрацоўніцтве з расійскімі калегамі з Інстытута ўсеагульнай гісторыі РАН па рэалізацыі сумесных праектаў па гісторыі Вялікай Айчыннай вайны.