11 красавіка 2017 года ў Інстытуце філасофіі НАН Беларусі адбылася рэспубліканская навуковая канферэнцыя “Беларускае філасофскае таварыства: гісторыя і сучаснасць”, якая сабрала вядучых вучоных-філосафаў НАН Беларусі, прадстаўнікоў кафедраў філасофіі і гуманітарных навук з г. Мінска і рэгіёнаў Беларусі. Падчас канферэнцыі былі разгледжаны актуальныя механізмы развіцця і папулярызацыі філасофскіх ведаў, арганізацыі навукова-гуманітарнай дыскусіі, рэалізацыі новых даследчых і выдавецкіх праектаў. На гэта звярнулі ўвагу прысутных прывітальнае слова Старшыні Прэзідыума НАН Беларусі акадэміка У.Р. Гусакова і ўступны даклад дырэктара Інстытута філасофіі А.А. Лазарэвіча. У сваіх выступленнях яны адзначылі ключавую ролю філасофскіх ведаў у дынаміцы інтэлектуальнай культуры краіны, закранулі пытанні папулярызацыі філасофскай спадчыны Беларусі і актуальных напрацовак філасофскіх школ краіны.

Лейтматывам канферэнцыі стала ідэя стварэння Беларускага філасофскага таварыства - грамадскай арганізацыі, якая аб’яднае інтарэсы вучоных-даследчыкаў, выкладчыкаў, аспірантаў і магістрантаў, якія вывучаюць філасофію, а таксама ўсіх тых, хто гатовы ўнесці свой уклад у развіццё філасофскіх ведаў і павышэнне іх статусу ў сацыякультурнай прасторы Беларусі. Беларускае філасофскае таварыства павінна стаць пляцоўкай міждысцыплінарнай дыскусіі, правядзення навуковых форумаў, выдання кніг, выканання даследчых праектаў; будзе прадстаўляць філасофскую супольнасць Беларусі сярод аб’яднанняў філосафаў іншых краін.

Дадзеная ініцыятыва атрымала адабрэнне як ад кіраўніцтва НАН Беларусі, так і з боку аўтарытэтных гасцей канферэнцыі - кіраўніцтва факультэта філасофіі і сацыяльных навук БДУ, прарэктараў і загадчыкаў кафедрамі айчынных ВНУ. Удзельнікі канферэнцыі аднагалосна падтрымалі рашэнне аб заснаванні і дзяржаўнай рэгістрацыі Рэспубліканскага грамадскага аб’яднання “Беларускае філасофскае таварыства”, зацвердзілі яго статут і абралі прэзідыум, у які ўвайшлі дэлегаты ад НАН Беларусі, сістэмы адукацыі, грамадскасці і дзелавых колаў. Узначаліць таварыства вядомы беларускі філосаф, акадэмік НАН Беларусі Я.М. Бабосаў.