Нацыянальная акадэмія навук Беларусі

25.05.2017

Новы праект “Вучоны пад ключ – 2017” стартуе ў НАН Беларусі 29 мая 2017 года

29 мая ў 11.00 у Цэнтральнай навуковай бібліятэцы імя Якуба Коласа НАН Беларусі (г. Мінск, вул. Сурганава, 15) адбудзецца адкрыццё Школы маладога вучонага “Вучоны пад ключ – 2017”. Арганізатар новага праекта, які праходзіць у рамках рэспубліканскага плана мерапрыемстваў па правядзенні ў 2017 годзе Года навукі - Савет маладых вучоных НАН Беларусі.

Школа маладога вучонага, якая пройдзе з 29 мая па 2 чэрвеня 2017 года, уяўляе сабой інтэнсіўны курс лекцый, семінараў, трэнінгаў і майстар-класаў вядучых вучоных краіны для магістрантаў, аспірантаў і таленавітых маладых вучоных па арганізацыі навуковай дзейнасці ў Нацыянальнай акадэміі навук Беларусі і Рэспубліцы Беларусь, публікацыі навуковых вынікаў, падрыхтоўцы і абароне дысертацый, кіраванні навуковымі праектамі. Мэта школы “Вучоны пад ключ” - павышэнне эфектыўнасці і ініцыятыўнасці маладых вучоных пры правядзенні навуковых даследаванняў, а таксама развіцця лідарскіх якасцей маладых вучоных для рэалізацыі самастойных навуковых праектаў.

У першы дзень маладым даследчыкам раскажуць аб фінансаванні навукі, навуковых праграмах, структуры Акадэміі навук Беларусі, яе функцыях і гісторыі. У астатнія дні тут навучаць усім тонкасцям падрыхтоўкі навуковых публікацый, прэзентацый, праектаў, дысертацый. Сярод тых, хто падзеліцца сваім вопытам навуковай дзейнасці - першы намеснік Старшыні Прэзідыума НАН Беларусі акадэмік Сяргей Чыжык, Галоўны вучоны сакратар НАН Беларусі, член-карэспандэнт Аляксандр Кільчэўскі, старшыня навуковага Савета БРФФД акадэмік Сяргей Гапоненка, старшыня ДКНТ Аляксандр Шумілін і многія іншыя.

Праграма прыкладаецца