6 чэрвеня 2017 года ў 9.30 у Вялікай канферэнц-зале гасцініцы “Беларусь” (вул. Старажоўская, 15) адбудзецца адкрыццё X Міжнароднай навуковай канферэнцыі “Мікробныя біятэхналогіі: фундаментальныя і прыкладныя аспекты”, прысвечанай Году навукі. У форуме, які працягнецца да 9 чэрвеня 2017 года, прымуць удзел вучоныя, спецыялісты аграпрамысловага сектара, прадстаўнікі біятэхналагічных кампаній з Беларусі, Расіі, Казахстана, Азербайджана, Латвіі, Польшчы, Туркменістана, Украіны, Грузіі, Малдовы. На канферэнцыі будзе прадстаўлена інфармацыя пра сусветныя тэндэнцыі і найноўшыя дасягненні ў галіне фундаментальнай і прыкладной мікрабіялогіі, сучасных падыходах да стварэння біяпрэпаратаў для сельскай гаспадаркі, прамысловасці, медыцыны, аховы навакольнага асяроддзя, абмеркаваны перспектывы эфектыўнай трансфармацыі вынаходстваў у інавацыі і ўкаранення навукаёмістых біятэхналогій у рэальны сектар эканомікі.

У рамках канферэнцыі адбудзецца I З’езд мікрабіёлагаў Беларусі, які пачне працу 7 чэрвеня 2017 года ў 9.00 у Вялікай канферэнц-зале гасцініцы “Беларусь”. Мерапрыемства, якое з’яўляецца знакавай падзеяй для айчыннай мікрабіялогіі, аб’яднае вядучых вучоных і спецыялістаў з профільных навукова-даследчых устаноў, вышэйшых навучальных устаноў, прамысловых прадпрыемстваў розных куткоў краіны для абмеркавання сучаснага стану мікрабіялагічнай навукі ў Рэспубліцы Беларусь і яе пазіцый на міжнароднай арэне, выяўлення найбольш перспектыўных напрамкаў развіцця фундаментальнай і прыкладной мікрабіялогіі, кансалідацыі намаганняў і наладжвання эфектыўнага ўзаемадзеяння для вырашэння важных агульнанавуковых і дзяржаўных задач у гэтай галіне. У працы З’езда прымуць удзел прадстаўнікі Прэзідыума Міжрэгіянальнага мікрабіялагічнага грамадства Расіі і Латвійскага таварыства мікрабіёлагаў, каб падзяліцца назапашаным вопытам, абмеркаваць перспектывы ўзаемавыгаднага супрацоўніцтва мікрабіялагічных таварыстваў і стымуляваць інтэграцыйныя працэсы з мэтай прагрэсіўнага развіцця і папулярызацыі мікрабіялогіі ў краінах Усходняй і Паўночнай Еўропы.

Круглы стол “Мікрабіём (мікрабіёта) чалавека ў норме і паталогіі”, які пачнецца 7 чэрвеня 2017 года ў 15.00 у канферэнц-зале Інстытута мікрабіялогіі НАН Беларусі (вул. Купрэвіча, 2), будзе прысвечаны разгляду актуальных праблем вывучэння мікрабіёты чалавека, механізмаў яе ўзаемадзеяння з арганізмам гаспадара, ролі ў падтрыманні здароўя і развіцці захворванняў, распрацоўкі спосабаў карэкцыі мікраэкалагічных парушэнняў.

На пасяджэнні Усходнепалеарктычнай секцыі Міжнароднай арганізацыі па біялагічнай барацьбе са шкоднымі жывёламі і раслінамі, якая адкрыецца 8 чэрвеня 2016 года ў 10.00 у канферэнц-зале Інстытута мікрабіялогіі НАН Беларусі, будуць заслуханы даклады, якія адлюстроўваюць сучасныя тэндэнцыі павышэння эфектыўнасці і экалагізацыі сельскагаспадарчай вытворчасці за кошт распрацоўкі і прымянення высокаэфектыўных біялагічных сродкаў абароны раслін.

6-7 чэрвеня 2017 года ў холе гасцініцы “Беларусь” будзе працаваць выстава айчыннай і замежнай біятэхналагічнай прадукцыі з мэтай прэзентацыі найноўшых распрацовак сусветнага ўзроўню для сельскай гаспадаркі, прамысловасці, экалогіі, аховы здароўя і іншых сфер.