НАН Беларусі зараз будзе выконваць функцыі базавай акадэміі навук у арганізацыйным і метадычным суправаджэнні Міжнароднай асацыяцыі акадэмій навук (МААН). Такое рашэнне прынята 9 жніўня 2017 года на пасяджэнні Прэзідыума НАН Беларусі.

Пастановай Прэзідыума прынята да ведама інфармацыя, выкладзеная ў пастанове Савета МААН, аб абранні Старшыні Прэзідыума Нацыянальнай акадэміі навук Беларусі Гусакова Уладзіміра Рыгоравіча кіраўніком МААН і выкананні НАН Беларусі функцый базавай акадэміі навук. Пастановай Прэзідыума НАН Беларусі арганізацыйна-метадычнае суправаджэнне дзейнасці МААН вырашана ўскласці на апарат НАН Беларусі.

Удзел НАН Беларусі ў дзейнасці МААН у якасці базавай арганізацыі павысіць ролю Рэспублікі Беларусь на міжнародным узроўні, будзе садзейнічаць фарміраванню новых узаемавыгадных міжнародных сувязей у навуковай сферы.

---

Даведачна: Міжнародная асацыяцыя акадэмій навук (МААН) створана ў 1993 годзе сумесным рашэннем акадэмій навук Азербайджанскай Рэспублікі, Рэспублікі Арменія, Рэспублікі Беларусь, Сацыялістычнай Рэспублікі В’етнам, Рэспублікі Грузія, Рэспублікі Казахстан, Кыргызскай Рэспублікі, Рэспублікі Малдова, Расійскай Федэрацыі, Славакіі, Рэспублікі Таджыкістан, Туркменістана, Рэспублікі Узбекістан, Украіны, Чэшскай Рэспублікі (пагадненне падпісана 23 верасня 1993 года).

Мэтай яе дзейнасці з’яўляецца аб’яднанне намаганняў вучоных і садзеянне ў вырашэнні найбольш агульных навуковых праблем развіцця грамадства, аб’яднанні фундаментальных даследаванняў, узгадненні навуковай палітыкі акадэмій навук, падтрымцы найбольш перспектыўных даследаванняў, выкарыстанні ўнікальнай і высокага кошту апаратуры. Прэзідэнтам МААН усе мінулыя гады з’яўляўся прэзідэнт Нацыянальнай акадэміі навук Украіны Патон Барыс Яўгенавіч, а НАН Украіны выконвала функцыі базавай арганізацыі МААН. Пастановай Савета МААН ад 25 мая 2017 года № 269 новым кіраўніком МААН прызначаны Старшыня Прэзідыума НАН Беларусі Гусакоў Уладзімір Рыгоравіч.