7-8 верасня 2017 г. Нацыянальная акадэмія наук Беларусі, Мінскі гарадскі выканаўчы камітэт, Аддзяленне гуманітарных навук і мастацтваў НАН Беларусі і Інстытут гісторыі НАН Беларусі праводзяць Міжнародную навуковую канферэнцыю “Мінск і мінчане: Дзесяць стагоддзяў гісторыі (да 950-годдзя горада)”.

Адкрыццё і пленарнае пасяджэнне канферэнцыі адбылося ў Мінскай гарадской ратушы. Работа секцый працягнецца 7 і 8 верасня ў Інстытуце гісторыі НАН Беларусі і Цэнтральнай навуковай бібліятэцы імя Якуба Коласа НАН Беларусі. Канферэнцыя стане важнай падзеяй у рамках святкавання 950-гадовага юбілею Мінска. У працы канферэнцыі запланаваны ўдзел вядомых спецыялістаў у галіне гісторыі Мінска: гісторыкаў, археолагаў, этнографаў, лінгвістаў, мастацвазнаўцаў, журналістаў, грамадскіх дзеячаў з Беларусі, Расіі, Польшчы, Украіны і Германіі. Прадугледжана правядзенне секцыі юных даследчыкаў гісторыі горада.

На канферэнцыі будуць прадстаўлены і абмеркаваны вынікі найноўшых даследаванняў па рэгіянальнай гісторыі і гістарычнай урбаністыцы, вызначаны перспектывы далейшых даследаванняў.

Праблемнае поле канферэнцыі:

сацыяльныя структуры і эканоміка;

духоўная і матэрыяльная культура;

Мінск у віхурах войнаў і рэвалюцый;

знакамітыя мінчане;

крыніцы па гісторыі горада;

турыстычны патэнцыял сталіцы Беларусі.

Правядзенне канферэнцыі сфарміруе неабходны навукова-тэарэтычны падмурак, на якім будуць грунтавацца веды па гісторыі горада, звесткі пра знакамітых гаражан, дазволіць стварыць базу для папулярызацыі і практычнага выкарыстання дасягненняў гістарычнай навукі, зробіць даступнымі для грамадства найноўшыя веды па гісторыі роднага краю, будзе садзейнічаць іх укараненню ў навучальны працэс, развіццю рэгіянальнага і міжнароднага турызму.