Савет маладых вучоных ДНУ “Інстытут гісторыі НАН Беларусі” праводзіць 1-2 сакавіка 2018 г. Першую канферэнцыю маладых даследчыкаў Інстытута гісторыі НАН Беларусі “Ars longa: навуковыя дасягненні, праекты, перспектывы”. Для прэзентацыі сваіх асобных або калектыўных праектаў і даследаванняў апошніх гадоў у канферэнцыі запрошаны маладыя навукоўцы, лабаранты і аспіранты. Арганізатары спадзяюцца, што правядзенне такой канферэнцыі будзе садзейнічаць развіццю ўнутрыінстытуцкіх прафесійных кантактаў і актывізуе творчыя пошукі маладых навукоўцаў.

Больш за трэць супрацоўнікаў Інстытута гісторыі НАН Беларусі складае моладзь. Маладыя навукоўцы прымаюць актыўны ўдзел ва ўсіх напрамках даследаванняў, штогод выступаюць на шматлікіх канферэнцыях і выпускаюць дзясяткі публікацый у Беларусі і за яе межамі. Разам з тым, як адзначаюць арганізатары, наспела патрэба ў стварэнні зручнай пляцоўкі для пастаяннай навуковай камунікацыі паміж маладымі навукоўцамі ў самім Інстытуце.