Выступаючы з прывітальным словам да ўдзельнікаў канферэнцыі, Галоўны вучоны сакратар НАН Беларусі Аляксандр Кільчэўскі ўспомніў творы найбольш знакавых прадстаўнікоў беларускай гістарычнай літаратуры і адзначыў іх значнасць як для беларускай гісторыі, так і для культуры ўсяго чалавецтва. “Без вывучэння гэтага пласта літаратуры немагчыма выхаванне будучага пакалення, немагчыма ідэнтыфікаваць беларусаў як нацыю – такая задача стаіць сёння перад нашымі гуманітарыямі і яны паспяхова яе выконваюць”, – сказаў Аляксандр Кільчэўскі.
Дырэктар Цэнтра даследаванняў беларускай культуры, мовы і літаратуры НАН Беларусі Аляксандр Лакотка адзначыў, што час правядзення канферэнцыі супадае з 75-ай гадавінай памяці Хатынскай трагедыі. “У агні Хатыні, у агні вайны нараджаліся наша годнасць, гонар, мужнасць і разуменне сябе як народа-пераможцы, як народа-змагара за свой лёс – усё гэта знаходзіла сваё адлюстраванне ў беларускай гістарычнай літаратуры”, – сказаў Аляксандр Лакотка.
З прывітальным словам да ўдзельнікаў канферэнцыі таксама звярнуўся пляменнік Максіма Гарэцкага – акадэмік НАН Беларусі Радзім Гарэцкі.
На працягу двух дзён канферэнцыі ўдзельнікі абмяркуюць наступны шэраг пытанняў: генезіс і тыпалогію жанраў гістарычнай літаратуры; гістарычную тэматыку ў шматмоўнай літаратуры Беларусі і беларускага замежжа; апісанне найбольш значных вех беларускай гісторыі ў літаратуры; аўтарскія мадэлі і стратэгіі ў беларускай гістарычнай літаратуры; жанрава-стылявыя пошукі беларускай літаратуры XX і XXI стагоддзя; а таксама навуковую, творчую і грамадскую дзейнасць Максіма Гарэцкага.