20 верасня 2018 года (чацвер) у 10.00 у НАН Беларусі (Мінск, пр. Незалежнасці, 66, Вялікая канферэнц-зала) адбудзецца ўрачыстае адкрыццё Юбілейнай сесіі Міжнароднай асацыяцыі акадэмій навук, прысвечанай 25-годдзю Асацыяцыі. У яе рабоце прымуць удзел кіраўнікі акадэмій навук краін СНД, вядучых замежных акадэмій, вядомыя вучоныя. Сярод пытанняў, якія будуць разгледжаны на пасяджэнні МААН 20-21 верасня – прыярытэтныя напрамкі дзейнасці Асацыяцыі, унясенне змяненняў у Палажэнне аб Міжнароднай асацыяцыі акадэмій навук, дзейнасць навуковых саветаў МААН, праца Арганізацыйна-тэхнічнага савета МААН. Кіраўнікі акадэмій навук абмяркуюць пытанні павышэння эфектыўнасці работы Саветаў маладых вучоных акадэмій навук. Па выніках будзе прынята адпаведная рэзалюцыя.

Юбілейная сесія МААН пройдзе на платформе Міжнароднага кангрэса па інтэлектуалізацыі эканомікі. У навукова-арганізацыйных мерапрыемствах Кангрэса прымуць удзел каля 500 прадстаўнікоў навукова-даследчых арганізацый, устаноў вышэйшай адукацыі, органаў дзяржаўнага кіравання і дзелавых колаў розных дзяржаў.

У праграму Кангрэса ўваходзіць правядзенне пяці Міжнародных навуковых канферэнцый: “Міжакадэмічнае ўзаемадзеянне і актуальныя выклікі сучаснасці”, “Сістэма “навука-тэхналогіі-інавацыі”: метадалогія, вопыт, перспектывы”, “Стратэгія развіцця эканомікі Беларусі: выклікі, інструменты рэалізацыі і перспектывы”, “Беларуская навука ва ўмовах мадэрнізацыі” і XVII Міжнародная навукова-тэхнічная канферэнцыя “Развіццё інфарматызацыі і дзяржаўнай сістэмы навукова-тэхнічнай інфармацыі” (РІНТІ 2018.).

У рамках форуму “РІНТІ – 2018” 20 верасня з 9.30 да 14.00 (вул Сурганава, 6) будзе арганізавана выстава апошніх распрацовак вучоных Аб’яднанага інстытута праблем інфарматыкі НАН Беларусі ў галіне інтэлектуальных інфармацыйных тэхналогій (штучнага інтэлекту).