У Нацыянальным прэс-цэнтры Рэспублікі Беларусь прайшла прэс-канферэнцыя “Навуковае суправаджэнне фармацэўтычнай галіны Беларусі. Перспектыўныя распрацоўкі айчыннай канкурэнтаздольнай фармацэўтычнай прадукцыі”, прымеркаваная да Дня работнікаў фармацэўтычнай і мікрабіялагічнай прамысловасці Беларусі. Ад НАН Беларусі ў мерапрыемстве прынялі ўдзел: Алена Мікалаеўна Калінічэнка, намеснік дырэктара па навуковай і інавацыйнай рабоце ДНУ “Інстытут біяарганічнай хіміі НАН Беларусі”, начальнік навукова-вытворчага цэнтра “ХімФармСінтэз”; Алена Валер’еўна Балотнік, намеснік дырэктара па навуковай і інавацыйнай рабоце ДНУ “Інстытут мікрабіялогіі НАН Беларусі”.

Алена Калінічэнка адзначыла ўклад НАН Беларусі ў развіццё фармацэўтычнай галіны рэспублікі. Па словах начальніка навукова-вытворчага цэнтра “ХімФармСінтэз”, акадэмія зарэкамендавала сябе як арганізацыя, арыентаваная на атрыманне высокатэхналагічных, навукаёмістых фармацэўтычных прадуктаў, для лячэння анкалагічных, сардэчна-сасудзiстых захворванняў і супрацьвірусных прэпаратаў. Асаблівасцю развіцця НАН Беларусі ў гэтым напрамку з’яўляецца стаўка на рэалізацыю поўнага цыкла вытворчасці лекавых прэпаратаў – ад распрацоўкі да выпуску гатовай прадукцыі.

Алена Балотнік расказала аб працы ДНВА “Хімічны сінтэз і біятэхналогіі”, адзначыўшы, што аб’яднанне ажыццяўляе маніторынг і каардынацыю развіцця біятэхналагічнай галіны Рэспублікі Беларусь. Таксама былі закрануты пытанні мадэрнізацыі навукова-вытворчай базы арганізацый НАН Беларусі для правядзення распрацовак у галіне біятэхналогій. Алена Балотнік прывяла шэраг найбольш значных прыкладаў рэалізацыі распрацовак Інстытута мікрабіялогіі ў дадзенай галіне.