30 кастрычніка 2018 года адбыўся візіт у НАН Беларусі Дзяржаўнай дэлегацыі Рэспублікі Арменія на чале з Прэзідэнтам Рэспублікі Арменія Арменам Саркісянам. Мэта візіту – абмеркаванне перспектыўных напрамкаў беларуска-армянскага навукова-тэхнічнага супрацоўніцтва. Сёння Прэзідэнт Рэспублікі Арменія Армен Саркісян правёў перагаворы з кіраўніцтвам Нацыянальнай акадэміі навук Беларусі, азнаёміўся з экспазіцыяй Музея гісторыі НАН Беларусі, пастаянна дзеючай выставай НАН Беларусі “Дасягненні айчыннай навукі – вытворчасці”. У ходзе візіту члены армянскай дэлегацыі наведалі ДНУ “Інстытут фізікі імя Б.І.Сцяпанава НАН Беларусі”.

Як адзначыў Прэзідэнт Рэспублікі Арменія Армен Саркісян падчас сустрэчы са Старшынёй Прэзідыума Нацыянальнай акадэміі навук Уладзімірам Гусаковым, Беларусь і Арменія павінны актывізаваць навуковае супрацоўніцтва ў галіне лічбавых і лазерных тэхналогій, кібербяспекі, выкарыстання ядзернай энергіі і фармацэўтыкі. На думку Прэзідэнта Арменіі, сярод перспектыўных напрамкаў – даследаванні ў галіне біятэхналогій, генетыкі, электронікі, вытворчасці прадуктаў харчавання. “Па гэтых напрамках мы наўпрост можам працаваць разам”, - падкрэсліў Армен Саркісян. Прэзідэнт Рэспублікі Арменія адзначыў, што ўражаны вынікамі навуковай дзейнасці вучоных арганізацый Нацыянальнай акадэміі навук, асабліва ў галіне касмічных даследаванняў, аўтаматычнай ідэнтыфікацыі аб’ектаў, тавараў і паслуг, а таксама электронікі. Армен Саркісян з цеплынёй успомніў, што ўпершыню наведаў гістарычны будынак НАН Беларусі яшчэ маладым навукоўцам у далёкім 1976 годзе, калі ўдзельнічаў у працы Міжнароднай канферэнцыі па фізіцы. “Сяброўства паміж Акадэміямі навук нашых дзвюх краін мае велізарную каштоўнасць”, - адзначыў Армен Саркісян.

Старшыня Прэзідыума НАН Беларусі Уладзімір Гусакоў, звяртаючыся да высокага госця, адзначыў, што літаральна тыдзень таму дэлегацыя НАН Беларусі вярнулася з урачыстых мерапрыемстваў, прысвечаных 75-годдзю Нацыянальнай акадэміі навук Арменіі. Падчас сустрэч з кіраўніцтвам прагаворваліся перспектыўныя напрамкі супрацоўніцтва. Сярод іх – сумесныя даследаванні беларускіх і армянскіх вучоных у галіне касмічных тэхналогій, біялогіі, аграрных і фізіка-тэхнічных навук. “У нас шмат агульных падыходаў. Мы дамовіліся аб аб’яднанні нашых намаганняў па цэлым шэрагу напрамкаў. Мы будзем разам працаваць. І мы зможам зрабіць многае для эканомік нашых дзвюх краін”, - падкрэсліў Уладзімір Гусакоў.

Прэзідэнт Рэспублікі Арменія вядомы як навуковец-фізік і дыпламат. Армен Саркісян скончыў Ерэванскі дзяржаўны ўніверсітэт па спецыяльнасці тэарэтычная фізіка і матэматыка. У 1976-1990 гг. – выкладчык фізічнага факультэта Ерэванскага дзяржаўнага ўніверсітэта. Заснаваў аддзяленне матэматычнага мадэлявання складаных сістэм кафедры тэарэтычнай фізікі Ерэванскага дзяржаўнага ўніверсітэта. Працаваў у якасці выкладчыка ў шэрагу замежных навуковых цэнтраў і ўніверсітэтаў. Армен Саркісян – ганаровы доктар Нацыянальнай акадэміі навук Арменіі.