У НАН Беларусі праведзена дендрахраналагічнае датаванне лодкі-чоўна, паднятага на мінулым тыдні з дна ракі Нёман каля вёскі Мікалаева Іўеўскага раёна Гродзенскай вобласці ў выніку сумеснай экспедыцыі Інстытута гісторыі НАН Беларусі, дайвінг-цэнтра “Марскі Пегас” і ўдзельнікаў джып форуму 4Х4. Вынікі даследаванняў паказалі, што човен быў зроблены прыблізна ў 1500-1510 гадах.

Спецыяльныя даследаванні праводзіліся пад кіраўніцтвам Максіма Ярмохіна, кандыдата біялагічных навук, вядучага навуковага супрацоўніка лабараторыі прадуктыўнасці і ўстойлівасці раслінных супольнасцей Інстытута эксперыментальнай батанікі імя В.Ф.Купрэвіча НАН Беларусі. Устаноўлена таксама, што на момант высечкі ўзрост дуба, з якога зроблена старажытная лодка, быў каля 300 гадоў. Такім чынам, дрэва пачало расці ў самым пачатку XIII стагоддзя.

У цяперашні час лодка-човен знаходзіцца ў Інстытуце гісторыі НАН Беларусі для правядзення кансервацыйных мерапрыемстваў і падрыхтоўкі да будучага экспанавання.

Як паведамлялася раней, 27 і 28 кастрычніка 2018 г. спецыялісты групы падводнай археалогіі Інстытута гісторыі НАН Беларусі, вадалазы дайвінг-цэнтра “Марскі Пегас” і ўдзельнікі джып форуму 4Х4 правялі сумесную экспедыцыю па падыманні старажытнай лодкі-чоўна з ракі Нёман. Лодка-доўбленка (човен) была выяўлена каля вёскі Мікалаева Іўеўскага р-на Гродзенскай вобласці мясцовымі жыхарамі. Лодкі-доўбленкі мелі шырокае прымяненне ў гаспадарчабытавой сферы. Яны выступалі асноўным відам воднага транспарту для старажытных жыхароў на тэрыторыі Беларусі, пачынаючы з перыяду каменнага веку. У асобных рэгіёнах выкарыстанне доўбленак фіксавалася аж да другой паловы і канца ХХ стагоддзя.

Фота В.Лакіза